Ura e vjetër e Milotit mbi lumin Mat është mbyllur përfundimisht për qarkullimin e automjeteve, pas konstatimit të dëmtimeve serioze në këmbët mbajtëse të saj.
Sipas Autoritetit Rrugor Shqiptar, dëmtimet janë pasojë e mungesës së ndërhyrjeve të rregullta për mirëmbajtje dhe marrjes së inerteve në afërsi të strukturës, çka e ka dobësuar ndjeshëm stabilitetin e urës.
Vendimi për mbylljen është marrë si një masë sigurie, për shkak të rrezikut për shembje, duke e bërë të pamundur qarkullimin mbi të.
Deri tani, nuk është dhënë asnjë informacion zyrtar nëse do të ketë ndërhyrje për rikonstruksionin apo cilat janë planet për këtë ure strategjike.
Situata është bërë edhe më kritike për shkak të fluksit të lartë të trafikut në aksin Milot–Lezhë, ku lëvizja është intensifikuar për shkak të sezonit turistik.
Mbyllja e urës pritet të shkaktojë kaos në qarkullim, me radhë të gjata në hyrje dhe dalje të Lezhës, duke ndikuar ndjeshëm në përditshmërinë e banorëve dhe pushuesve që kalojnë në këtë segment të rëndësishëm rrugor.
