Nëse do të binte një tërmet tjetër si ai i nëntorit të vitit të kaluar, situata do të ishte në përmasa edhe më katastrofike. Një numër më i madh qytetarësh që jetojnë në Tiranë e Durrës, mund të kishin pasoja fatale për jetën, nëse kjo gjë do të përsëritej.
Alarmin për këtë e ka dhënë studimi më i fundit i Bankës Botërore, sipas të cilit në dy qytetet më të mëdha të vendit, ka një mori ndërtesash të rrezikshme.
Banka Botërore analizoi së fundmi se 10% e popullsisë në Tiranë dhe 6% e popullsisë në Durrës, jetojnë aktualisht në ndërtesa me rrezikshmëri shumë të lartë, duke lajmëruar se ato mund shemben në rast të një tërmeti tjetër.
Tirana është qyteti më i madh në Shqipëri, në të cilin banon afërsisht 17% e popullsisë së përgjithshme.
Dy llojet e ndërtesave që rrezikojnë më shumë janë, pallatet me beton të armuar dhe ndërtesat me muratura, të cilat mund të shkaktojnë më shumë fatalitete.
Gati 50,000 njerëz, ose rreth 10% e popullsisë banojnë në ndërtesa me rrezik të lartë, analizon BB.
Ndërsa në Durrës përafërsisht 7000 njerëz, ose rreth 6% e popullsisë së qytetit, banojnë në lloje të ndërtesave me rrezik të lartë.
Shqipëria ka përjetuar shumë tërmete me ashpërsi të mëdha edhe në të shkuarën. Më vdekjeprurësit ishin një seri tërmetesh në 1851 pranë qyteteve të Vlorës dhe Beratit, duke shkaktuar humbjen e 600 jetëve.
Një tjetër tërmet i madh me magnitudë 6.5 në vitin 1967 shembi rreth 500 shtëpi, lëndoi 170 persona dhe shkaktoi 20 fatalitete. Së fundmi, në vitin 2019, Shqipëria u godit nga një seri tërmetesh të dëmshme, nga më të fortët dhe më të shumtët vdekjeprurës, prej të cilëve ishte tërmeti me magnitudë 6.4 më 26 nëntor.
Kjo ngjarje, që shkaktoi 50 viktima dhe mbi 2000 të plagosur, krijoi 1 miliard euro dëme. Përafërsisht 1,500 ndërtesa u dëmtuan në kryeqytet.
Banka Botërore analizon se një pjesë e madhe pallateve në Shqipëri dhe në të gjitha qytetet e Europës Qendrore, Ballkanit dhe Azinë Qendrore janë të prirura të pësojnë dëme nga tërmetet.
Tërmetet në këto rajone kanë dëmtuar lloje të caktuara të ndërtesave (pallate) pjesërisht ose plotësisht, duke shkaktuar shumë të pastrehe dhe fatalitete.
Dobësia e këtyre objekteve i atribuohet mënyrës së ndërtimit dhe mungesës së mirëmbajtjes, mbikëqyrjes gjatë shumë dekadave.
Studimi i fundit i Bankës Botërore analizon rrezikun nga tërmeti për familjet që jetojnë në banesa të ndërtuara para vitit 2000 dhe ofron të dhëna për shtetet në mënyrë që të përmirësojnë sigurinë e tyre.
/Burimi: Monitor.al/ Përshtati: GazetaReforma.com/
