Një shpërthim i fuqishëm ka ndodhur në kryeqytetin libanez, Bejrut, ditën e djeshme ku raportohet se kanë ndërruar jetë mbi 100 persona, janë lënduar më shumë se 4 mijë të tjerë dhe rreth 300,000 libanezë kanë mbetur të pastrehë.
Shkaku i shpërthimit ishin mbi 2,750 tonë nitrat amoniumi që mori flakë kur një zjarr i ndezur siç duket nga një saldator u përhap në magazinën ku ishte ruajtur materiali në mënyrë të pasigurt për gjashtë vjet.
Ndërkohë shumë libanezë besojnë se e gjithë kjo ka ndodhur; nga keqmenaxhimi i pamasë në një shtet të shkatërruar të drejtuar nga një klasë politike e korruptuar, për të cilën ata thonë se trajtojnë banorët e vendit me përbuzje.
Disa zyrtarë, punonjës të portit në Bejrut janë vënë në pranga, me arrest shtëpie pasi akuzohen se kanë treguar neglizhencë në detyrën që u është ngarkuar, duke bërë kështu që të shpërthente ngarkesa e ruajtur prej 2.750 ton nitrat amoni.
Mësohet se deri më tani rreth 300,000 njerëz kanë humbur shtëpitë e tyre dhe autoritetet po punojnë për t’i siguruar ushqim, ujë dhe strehim.
Dëshmitarët e krahasuan tragjedinë me një shpërthim bërthamor, dhe shkencëtarët duke bërë llogaritjet fillestare thanë se 2,750 tonë kimikate të rrezikshme prodhuan një shpërthim ekuivalent afërsisht sa një e pesta e forcës së bombës atomike në Hiroshima në Luftën e Dytë Botërore.
Presidenti Michel Aoun shpalli tre ditë zie dhe njoftoi se do të akordojë një fond emergjence prej 66 milionë dollarësh.
