Në Kosovë kanë mbërritur 971 refugjatë afganë deri në mesidetën e së hënës. Lajmi është konfimuar për Radion Evropa e Lirë nga Jeta Tela, shefe e kabinetit dhe këshilltare e lartë politike e ministrit të Punëve të Brendshme të Kosovës, Xhelal Sveçla.
Mësohet se 810 refugjatë janë akomoduar në kampin Bechtel-Eenka në Ferizaj, ndërsa 161 të tjerë në kampin Bondsteel, po ashtu në Ferizaj.
Qytetarët afganë të mbërritur në Kosovë, do të qëndrojnë aty derisa të kenë në rregull dokumentacionin për t’u vendosur në Shtetet e Bashkuara të Amerikës ose në ndonjë shtet tjetër që është anëtar i NATO-s.
Prej 15 gushtit, kur talebanët morën sërish pushtetin në Afganistan, qindra mijëra njerëz janë larguar nga vendi. SHBA dhe aleatët përfunduan evakuimet më 31 gusht, që ishte edhe afati i fundit i vendosur nga talebanët. Pjesa më e madhe e njerëzve që janë larguar kanë punuar për ushtrinë amerikane ose vendet e tjera aleate të NATO-s dhe qëndrimi i tyre në Afganistan ishte me rrezik. SHBA njoftoi se do të largohej nga Afhanistani, pas pushtimin 20-vjeçar të vendit.
Kosova pritet të strehojë përkohësisht rreth 2 mijë shtetas afganë. Po ashtu edhe Shqipëria do të strehojë rreth 4 mijë qytetarë afganë, ndërsa një pjesë prej tyre kanë mbërritur tashmë në vend.
