Ka shkuar në 5 numri i të arrestuarve për rrëmbimin e vrasjen e Jak Prengës.
Policia bën me dije se është ndaluar në Kavajë një 30-vjeçar me iniciale F.B.
Bazuar në hetime, rezulton se ky shtetas ka bashkëpunuar me 4 të arrestuarit e tjerë, për rrëmbimin e Prengës në Kamëz.
Atij i janë sekuestruar 2 telefona dhe një sasi prej 850 eurosh.
Njoftimi i policisë:
Tiranë
Shkon në 5 numri i të arrestuarve në lidhje me pengmarrjen, me pasojë vdekjen e shtetasit J. P.
Sektori për Krimet e Rënda në Drejtorinë Vendore të Policisë Tiranë, nën drejtimin e Prokurorisë pranë Gjykatës së Shkallës së Parë Tiranë, në vijim të veprimeve të kryera për zbardhjen dhe dokumentimin e plotë të ngjarjes mbi rrëmbimin e shtetasit J. P., të ndodhur në rrugën “London”, Kamzë, në bashkëpunim me Komisariatin e Policisë Kavajë, ka bërë ndalimin e shtetasit F. B., 30 vjeç, banues në Kavajë.
Nga tërësia e veprimeve hetimore të kryera nga Sektori për Krimet e Rënda në DVP Tiranë, në bashkëpunim me Departamentin e Policisë Kriminale, nën drejtimin e Prokurorisë, dyshohet se ky shtetas, në bashkëpunim me 4 shtetasit e ndaluar më parë dhe me shtetas të tjerë, e kanë rrëmbyer për ta mbajtur peng, shtetasin J. P., më datë 17.01.2020, në Kamzë.
Në cilësinë e provës materiale shtetasit F. B. i janë sekuestruar dy telefona dhe një sasi prej 850 eurosh. Për shkak të rëndësisë së hetimit, nuk bëhen të ditura detaje të tjera.
Sektori për Krimet e Rënda në DVP Tiranë, në bashkëpunim me Prokurorinë vijon punën për dokumentimin e plotë të kësaj ngjarjeje dhe gjetjen e trupit të shtetasit J. P.
Materialet do i kalohen për ndjekje të mëtejshme Prokurorisë pranë Gjykatës së Shkallës Parë Tiranë, për veprat penale “Rrëmbimi ose mbajtja peng e personit”, “Fshehja ose asgjësimi i kufomës”, “Veprime që pengojnë zbardhjen e të vërtetës”, “Përkrahja e autorit të krimit”, të kryera në bashkëpunim dhe “Armëmbajtja pa leje”.
Jak Prenga u dhunuar dhe më pas u mor peng 12 ditë më parë në Kamëz.
Autorët kishin në plan ta mbanin pengun në kompleksin “Golden” në Shijak
Mirëpo Prenga ndërroi jetë rrugës, si pasojë e goditjeve dhe gjakderdhjes.
Në lidhje me këtë ngjarje janë arrestuar Leonard Hajri, O.T., B.H. dhe E.H.
Gjithashtu është shpallur në kërkim Altin Hajri, njëri nga pronarët e kompleksit “Golden”.
Mësohet se shkak për ngjarjen e rëndë është bërë një dërgesë kokaine, që vëllai i viktimës nuk e çoi në destinacion.
