Ish-moderatorja shqiptare Floriana Garo është prurja më e re në Partinë Demokratike për zgjedhjet e 25 prillit. Bukuroshja do të mbajë postin e zëdhënëses gjatë fushatës zgjedhore, ndërsa ka bërë disa ditë më parë edhe daljen e parë publike nga selia blu. E ftuar në News 24 ajo ka treguar edhe si erdhi vendimi për t’u bërë pjesë e demokratëve, duke thënë se e kishte menduar prej kohësh. Garo ka treguar se ftesa i ka ardhur nga Lulzim Basha dhe ka synim për të vijuar.
“Ishte një mendim i menduar prej disa kohësh, jo shumë, gjithmonë me bashkëshortin e kemi biseduar mundësinë e rikthimit në Shqipëri. Ai ka jetuar 28 vite në Zvicër por është shqiptar dhe patriotizmin e ka pasur brenda. Ftesen ma bëri Lulzim Basha por unë vetë kam shprehur dëshirën për të kontribuar në PD. Ka qenë një vendim i diskutuar me familjen dhe isha e gatshme të jepja kontributin tim. Misioni do të vijojë, jam kthyer me këtë qëllim. Është e rëndësishme që njeriu të provojë veten, por synimi është për të vijuar“, tha Garo.
Ajo gjithashtu ka komentuar edhe qeverisjen e Ramës, duke thënë se është marrë shumë me imazhin e megjithatë nuk ka investuar në jetën e shqiptarëve. Sipas saj në Zvicër bëhen investime shumë më të lira që janë falas për qytetarët, ndërsa në Shqipëri shpenzohen 25 milionë euro për një rrugë.
“Është marrë shumë me imazhin, me rregullimin e shesheve, disa rruga të vogla, e megjithatë borxhi është rritur dhe nuk janë bërë investime për të rregulluar jetën e shqiptarëve. Vjet është përfunduar një plazh i mrekullueshëm në Gjenevë, është bërë një plazh nga e para, muze, rruga nga e para, krejt falas për qytetarët dhe i gjithë ky projekt ka kushtuar 65 milionë franga. Kështu që i gjithë ky investim për kaq para. Këtu në Shqipëri bëhet 25 mln euro një rrugë. Njerëzit paguajnë për këtë gjë dhe kjo më ka bërë vërtetë të mendoj: kjo nuk është në rregull”, tha Floriana.
