Ditën e sotme KQZ i ka dhënë mandatin Arkend Ballës, si deputeti më i ri i Kuvendit.
Theksojmë se Balla mori mandatin, pas dorëheqjes së Rrahman Rrajës, pas dhunës barbare të familjarëve të tij, ndaj kushërinjve të fisit Maja, në Krujë. Për dhunën ndaj dy kushërinjve, akuzohen 2 vëllezërit e ish deputetit socialist dhe djali i tij Rexhep Rraja. Ky i fundit njoftoi dorëheqjen nga posti më 8 Korrik, disa ditë pas dhunës barbare që djali i tij, Rexhep Rraja dhe dy vëllezërit, Xhelal dhe Flamur Raja ushtruan nga dy kushërnjve Maja. Dy kushërinjtë kishin denoncuar më parë prishjen e shtëpive nga shpërthimet e një guroreje që administrohej nga të afërmit e deputetit.
DEKLARATA E RRAHMAN RRAJËS
Ju kërkoj ndjesë shokëve dhe kolegëve të grupit parlamentar dhe deklaroj dorëzimin e mandatit të deputetit dhe tërheqjen time nga jeta politike. Ju kërkoj ndjesë atyre që më kanë dhënë votën prej vitit 2000 si kryetar komune dhe prej 2 mandatesh si deputet. Ju kërkoj ndjesë viktimave të asaj dhune turpëruese për familjen time. I bëj thirrje djalit tim të dorëzohet para drejtësisë. Zoti më dhëntë forcë që ta përballoj këtë dhimbje të madhe dhe jetë që ta shlyej këtë turp që më la mbi shpatulla si gur im bir. Në fund mirënjohje dhe ndjesë edhe kryetarit të partisë dhe kryeministrit, i cili nuk më kishte asnjë borxh për këtë shqetësim kaq të madh publik që i shkaktova.
