Prokuroria e Fierit ka dhënë një informacion të detajuar lidhur me vrasjen e dyfishtë të ndodhur në fshatin Kurjan të Roskovecit, ku viktima mbetën Gramoz dhe Lavdimir Kurtaj, ndërsa si autor i krimit u arrestua Artur Kuka.
Pas ngjarjes janë shoqëruar edhe dy djemtë e autorit, Erivs dhe Emaurisio Kuka, 21 dhe 18 vjeç, si dhe Tomor Zyka.
“Në lidhje me këtë ngjarje, pas veprime hetimore të kryera në bashkëpunim me policinë gjyqësore, u arrestuan në flagrancë tre shtetasit A.K, E.K, E.K. pasi nga provat e administruara deri në këtë fazë të hetimeve u krijua dyshimi i arsyeshëm se ata kanë kryer veprën penale “Vrasja në rrethana të tjera cilësuese” kryer në bashkëpunim, parashikuar nga neni 79, shkronja “dh” dhe 25 të K.Penal. Po ashtu, është kryer arrestimi në flagrancë i shtetasit T.Z., si i dyshuar për kryerjen e veprës venale “Përkrahja e autorit të krimit” parashikuar nga neni 302/2 i K.Penal.
Më datë 12.09.2024, për shtetasit A.K, E.K, E.K dhe T.Z. u paraqit në Gjykatën e Shkallës së Parë të Juridiksionit të Përgjithshëm Fier kërkesa për vleftësimin e ligjshëm të arrestit në flagrancë dhe caktimin e masës së sigurimit “Arrest në burg” parashikuar nga neni 238 i K.Pr.Penale”, thuhet në njoftimin zyrtar të Prokurorisë. Prokuroria e Fierit shprehet se lidhur me ngjarjen e rëndë janë arrestuar 4 persona, për të cilët Gjykata ka caktuar masat e sigurisë arrest me burg.
