Operacioni “Bregdeti Ynë” ishte pezulluar prej dy muajsh për shkak të sezonit turistik. Ndërsa z/v ministri i Brendshëm, Julian Hodaj thotë se nga sot e në vijim do të vijojë në të gjithë bregdetin e zona të tjera. Operacioni ka filluar me shembjen e objektit 5-katësh në Dhërmi. Gjithashtu ai ka paralajmëruar se asnjë ndërtues pa leje apo zyrtar nuk ka për t’u toleruar.
‘’Rifillon nga Dhërmiu operacioni bregdetar, që ishte pezulluar për 2 muaj prej sezonit turistik. Angazhim maksimal i qeverisë shqiptare për të luftuar paligjshmërinë në territorit. Kushdo duhet të harrojë dhe mos e gënjejë mendja që mund të zaptojë 1 m2 territor publik.
Askush nuk do të lejohet e tolerohet të abuzojë me territorin. Operacioni do të vijojë në gjithë bregdetin, më pas në zonat e tjera. Askush nuk tolerohet që ndërton pa leje dhe zyrtarët që mbyllin sytë para paligjshmërisë.’’- tha Hodaj.
Ditën e sotme IKMT ka shembur një banesë 5 katshe me shpërthim të kontrolluar në Dhërmi. Punonjësit e IKMT-së janë përballur me rezistencën e firmës e cila kishte në pronësi objektin dhe që kundërshtoi vendimin pasi pretendonte se kishte leje nga Bashkia e Himarës ndërsa shembja është firmosur nga dy inspektorë të arrestuar disa ditë më parë për shpërdorim detyre.
