Shqiptarët do të kenë sërish mundësi të lëvizin drejt Greqisë, pasi dogana e Kakavijës është rihapur.
Kjo pikë kufitare qëndroi e mbyllur për 24 orë për shkak të një greve në doganat greke, ndërsa sot puna ka filluar normalisht sipas regjimit të reduktuar për 750 persona në ditë, që prej orës 6 të mëngjesit.
Ata që po kalojnë kufirin janë kryesisht punëtorë sezonalë, që i pret një kontratë në anën greke të kufirit.
Edhe për ta nuk ka qenë shumë e lehtë. Disa tregojnë se janë rikthyer sërish tek kjo radhë, pasi janë kthyer pas nga autoritetet greke ditë më parë, për parregullsi të ndryshme. Ajo që vlen të theksohet është se, në këtë radhë nuk është duke u respektuar distancimi social.
“Unë po shkoj në Lamia të Greqisë. Para tre ditësh më kthyen, nuk e di se çfarë më nxorën. Mua mi ka dërguar të gjitha letrat pronarja të shohim sot. Tani u ktheva dhe bëra test tjetër sepse kishin kaluar 72 orë.
Bashkë jemi të tre. Na kthyen ca ditë më parë. Vetëm na thanë ikni pas. Nuk e morëm vesh. Bëmë teste përsëri dhe do ta provojmë edhe sot”,- tha një emigrant shqiptar.
“Po shkoj në Greqi për të punuar. Të paktën të punoj dy muaj e pastaj do kthehem prapë. E di që bëjnë teste të tjera në anën tjetër, nuk e di kur të kalojmë do shohim”,- deklaroi një tjetër shqiptar.
Edhe për transportin e mallrave qarkullimi ka qenë i ndërprerë gjatë 24 orëve të kaluara, ndërsa radha e mjeteve të transportit shkonte sot në mëngjes në gati 1 km.
/GazetaReforma.com/
