Në javën e dytë të majit, në Kosovë janë regjistruar nëntë raste të fruthit te fëmijët e moshës 1 deri në 5 vjeç, sipas një njoftimi të Institutit Kombëtar të Shëndetësisë Publike të Kosovës.
Rastet janë shpërndarë në këto komuna, katër në Ferizaj, dy në Shtime dhe nga një rast në Lipjan, Graçanicë dhe Fushë Kosovë.
Të gjithë fëmijët e prekur nuk ishin të vaksinuar me vaksinën MMR (kundër fruthit, rubeolës dhe shytave).
IKSHPK paralajmëron se këto nuk janë më raste të ardhura nga jashtë, por shpërthime brenda komunitetit, të lidhura drejtpërdrejt me mungesën e vaksinimit.
Instituti kishte deklaruar në fillim të vitit se nuk pritej ndonjë shpërthim i fruthit, duke u mbështetur në të dhënat që tregonin një mbulim të lartë vaksinimi në Kosovë mbi 90%.
Në shkallë evropiane, ndërkohë, normat e vaksinimit me dozën e parë të MMR kanë rënë nga 96% në vitin 2019 në 93% në vitin 2022. Për dozën e dytë, rënia ka qenë më e lehtë nga 92% në 91%.
