Vala e nxehtë politike, ka rikthyer në skenë ish-deputetën e PS-së, Arta Dade.
Edhe pse prej një viti e gjysëm, Dade është larguar nga arena politike, ajo ka zgjedhur “A Show” për të dhënë disa mesazhe të forta kundër qeverisë Rama.
Dade shprehet se në PS nuk ka garë demokratike, pasi është hequr procesi i zgjedhjeve.
Në akuzat e saj, ish-ministrja e Jashtme shton se qeveria Rama nuk arriti që të ndalonte korrupsionin dhe se Shqipëria ka mbetur mbrapa sa i takon integrimit.
Duke folur për marrëdhëniet me Kosovën, Dade tha se Shqipëria më shumë i ka prishur punë, sesa e ka ndihmuar atë.
“Në PS është hequr procesi i zgjedhjeve dhe është zhdukur gara. Zgjedhjet nuk i fiton partia. Unë kam kandiduar me Blushin disa herë në parti. Blushin e sillte Nano, por deri aty. Më pas fitoja unë. Partitë duhet të jenë sa më demokratike. Shqipëria ka pasur pikën më të fortë kartën rajonale, e cila është zbehur tashmë.
Çfarë është bërë për të afruar Shqipërinë me Kosovën? Më shumë i ka prishur punë Kosovës. Nëse do kishim një Shqipëri me prosperitet dhe pa korrupsion, kjo është ndihma më e madhe që i japim Kosovës dhe rajonit. Është për të ardhur keq që vendi ynë ka mbetur mbrapa në procesin e integrimit”- tha Dade.
