Rikthehen në detyrë disa prej kontrollorëve të trafikut ajror të kompanisë AlbControll. Aktualisht hapësira ajrore e Shqipërisë po monitorohet nga kontrollorë turq, grekë dhe shqiptarë. Lajmin e ka bërë të ditur ministrja e Infrastrukturës, Belinda Balluku. Ndërkohë që mësohet se kompania AlbControl është në bisedim edhe me partnerë të tjerë për të siguruar kontrollorë shtesë.
“Albcontrol në normalitet të plotë. Kontrollorët e kthyer në përgjigje të apelit tonë jane në krye të detyrës. Drejtësia të zbardhë deri në fund ngjarjen e rëndë. Plani i pengmarrjes dështoi.”, ka thënë ministrja e Infrastrukturës Belinda Balluku.
Kujtojmë se trafiku ajror në Shqipëri u bllokua për dy ditë, pas grevës së kontrollorëve, të cilët ndërprenë punën për shkak të uljes së pagave. Aktualisht ndodhen në ambientet e paraburgimit, kreu i Sindikatës, Armando Fezga, përgjegjësja e turnit, Flora Ndreca dhe Muhin Mezini pasi akuzohen se janë organizatorë të kësaj protestete dhe akuzohen për veprën penale “shpërdorim detyre”.
Protesta e kontrollorëve erdhi pas vendimit për përgjysmim të rrogës së tyre. Ndërsa mbi 20 të tjerë janë shoqëruar në Polici gjatë natës për t’u marrë në pyetje, ndërsa më pas janë lënë të lirë. Ndërkohë, sot në aeroportin e Rinasit u rikthye normaliteti, pasi filluan edhe fluturimet për pasagjerët.
