Një emigrant i huaj është riatdhesuar drejt vendit të origjinës pas qëndrimit në Qendrën e Riatdhesimit në Gjadër struktura e ngritur në bazë të marrëveshjes mes Italisë dhe Shqipërisë për menaxhimin e emigracionit të parregullt.
Bëhet fjalë për një 42-vjeçar nga Bangladeshi, i cili kishte hyrë në Itali që në vitin 2009.
Ai u dëbua nga autoritetet italiane për shkak të konsiderimit si rrezik i lartë shoqëror, pasi më herët ishte dënuar për disa vepra penale, përfshirë dhunë të rëndë në familje.
Pas përfundimit të procedurave ligjore dhe qëndrimit të përkohshëm në qendrën e Gjadrit, ai u deportua drejt vendit të tij.
Në një reagim në platformën X, ministri i Brendshëm italian, Matteo Piantedosi, e përshkroi këtë si një hap konkret në zbatimin e strategjisë kundër emigracionit të paligjshëm:
“Ky është riatdhesimi i parë i realizuar nga Shqipëria përmes Qendrës së Riatdhesimit në Gjadër. Operacionet e këtij lloji do të vijojnë në ditët në vijim, si pjesë e planit të qeverisë për një reagim më efektiv ndaj fenomenit të emigracionit të parregullt,” – shkroi Piantedosi.
