Deputetët Ina Zhupa dhe Dashnor Sula kanë kritikuar ashpër qeverinë dhe Kryetaren e Kuvendit, Lindita Nikolla, në seancën plenare të sotme.
Deputetja e PD-së, Ina Zhupa, shprehu pakënaqësinë e saj për interpretimin e Rregullores nga Kryetarja Nikolla. Ajo theksoi se është e nevojshme të konsultohen me ekspertët për çështjet e rregullores. “Njohuritë e tyre janë të cekëta. Duhet të konsultoheni me ekspertët. Ku thuhet që mocionet me debat bëhen vetëm mbi veprimtarinë e Këshillit të Ministrave? Kemi bërë mocion për gjenocidin në Srebrenicë dhe luftën në Ukrainë, cila nga këto është veprimtari e këshillit të Ministrave?” tha Zhupa. Ajo gjithashtu akuzoi kryeministrin Rama për trajtimin e keq të gazetarëve, duke thënë se “Rama i trajton gazetarët në mënyrën më të keqe të mundshme.”
Ndërkohë, deputeti i PD-së, Dashnor Sula, kërkoi më shumë kohë për miratimin e komisionit të posaçëm anti-korrupsion. Ai ironizoi mazhorancën duke thënë se, ndonëse ata e kanë luftuar korrupsionin për 11 vite, s’do të ishte bërë nami po të prisnin edhe dy javë. “Unë do ju kërkoja shumë sinqerisht, por mos ta teproja, shumë miqësisht, që në seancën e sotme ku kemi dhe pr. vendimin për ngritjen e komisionit për luftën kundër korrupsionit, arsyeja që kërkoj që të tërhiqet ai vendim, është që të raportojnë institucionet e pavarura. Duke nisur nga prokurori i Përgjithshëm, drejtuesi i SPAK-ut. Ata akoma s’kanë ardhur të raportojnë.” tha Sula.
