Kryeministri i Kosovës, Albin Kurti, është i detyruar me urdhër të Gjykatës Themelore të Prishtinës që gjatë ditës së sotme të paraqitet për intervistim në Prokurorinë Speciale. Megjithatë, mbetet e paqartë nëse ai do t’i përgjigjet kësaj thirrjeje.
Sipas një njoftimi nga Ministria e Arsimit, Kurti ka planifikuar që në të njëjtën orë, 10:00, të ndodhet në Gjilan, ku së bashku me ministren Arbërie Nagavci do të vendosë gurthemelin e një çerdheje të re.
Më 28 shkurt, zëdhënësja e Gjykatës Themelore në Prishtinë, Mirlinda Gashi, konfirmoi për Reporteri.net se Kryeministri Kurti është thirrur në cilësinë e dëshmitarit për të dhënë dëshmi lidhur me skandalin e Rezervës Shtetërore më 4 mars. Gjykata Themelore e Prishtinës e ka obliguar atë të paraqitet në Prokurorinë Speciale në orën 10:00, pas një kërkese të Prokurorisë Speciale të Republikës së Kosovës.
Nga ana tjetër, Zyra e Kryeministrit i ka kërkuar Gjykatës që të detyrojë Prokurorinë Speciale të realizojë intervistimin brenda zyrave të Qeverisë, duke argumentuar se Kurti ka një agjendë të ngjeshur.
Zëdhënësi i qeverisë, Përparim Kryeziu, përmes një deklarate të publikuar në Facebook, ka theksuar se Kryeministri është i gatshëm të japë dëshminë e tij, por ka ngritur dyshime se thirrja mund të ketë motive politike dhe jo ligjore.
Thirrja për intervistim ishte bërë fillimisht më 12 dhjetor, kur Qeveria e Kosovës e kishte pranuar ftesën e Prokurorisë Speciale. Kurti ishte caktuar të paraqitej më 16 dhjetor në orën 09:30, por nuk e kishte bërë një gjë të tillë. Në vend të kësaj, ai kishte kërkuar që intervistimi të zhvillohej në zyrën e tij, madje kishte ofruar edhe dy data alternative.
Kurti është thirrur si dëshmitar në hetimet për skandalin me Rezervat Shtetërore, një çështje që lidhet me akuzat për korrupsion dhe keqpërdorim të pozitës zyrtare, sipas Nenit 414 të Kodit Penal të Kosovës.
