Një studim i fundit nga Qendra për Kontroll dhe Parandalim të Sëmundjeve në Amerikë ka dalë në përfundimin se të dalësh jashtë për të ngrënë është më e rrezikshme se veprimet tjera gjatë pandemisë së koronavirusit.
Për të bërë këtë studim u morën 314 të rritur që ishin testuar për COVID-19, dhe qendra doli në përfundimin se ata që dolën pozitiv ishin ata që kishin ngrënë dy herë më tepër nëpër restorante para se të sëmureshin.
Nga 314 personat e testuar, gati gjysma kishin rezultuar pozitivë dhe gjysma negativë. Hulumtuesit kanë pyetur secilin pjesëmarrës në studim se çfarë kanë bërë në dy javët e fundit para se të testoheshin për koronavirus, përfshirë mbajtjen e maskave apo të qenit në restorante, bare e qendra fitnesi, thuhet në studim.
Të gjithë kishin dhënë përgjigje të ngjashme, përveç kur bëhej fjalë për të qenit në restorante. Të dhënat kanë treguar se njerëzit që kishin rezultuar pozitivë kishin shkuar më shumë nëpër restorante.
Ndërkohë kujtojmë se një ndër masat për parandalimin e përhapjes së COVID-19 është edhe mbyllja e restoranteve dhe bareve, por me ardhjen e verës shumë vende në botë filluan të rihapin restorantet me masa të reja.
Në gjithë botën deri më tani janë infektuar më shumë se 28 milionë njerëz, ndërsa kanë vdekur mbi 910 mijë.
Burimi/KohaNet
