Një aksion i madh antidrogë po zhvillohet në fshatrat përreth Krujës, me qëllim parandalimin e kultivimit të lëndëve narkotike. Mësohet se në operacion janë përfshirë forca të shumta të RENEA dhe FNSH, gjithashtu bëhet me dije se janë përqendruar në fshatin Nikël. Burime bëjnë me dije se janë shoqëruar disa persona deri në këto momente. Në terren ka zbritur edhe kreu i Policisë së Shtetit Ardi Veliu i shoqëruar nga Tonin Vocaj e Gjovalin Loka.
Aktualisht forcat e RENE-s dhe FNSH-s po bëjnë krehje të zonës duke kontrolluar serat, magazinat dhe shtëpitë rreth e përqark zonës. Mësohet se janë sekuestruar disa kubikë me fidanë kanabisi. Mësohet se në operacion, ku marrin pjesë Forcat Renea, FNSh e Tiranës, FNSh Fier dhe Policia e Durrësit, po ushtrohen kontrolle në zonën e pyllëzuar të qytetit të Krujës, por kryesisht janë ndalur në zonën e Niklës, si dhe në sera, magazina, banesa.
Aksioni në fjalë vjen pas monitorimeve me drone nga ana e Policisë së Shtetit dhe nga ajri nga GDF.
Kujtojmë se operacioni në fjalë po drejtohet nga drejtori i Përgjithshëm i Policisë së Shtetit Ardi Veliu, Drejtori i Departamentit të Policisë Kriminale Tonin Vocaj dhe Drejtori i Departamentit të Sigurisë Publike Gjovalin Loka.
