Kushtet e favorshme atmosferike mundësuan zhvillimin e edicionit të 14-të të kampionatit ndërkombëtar të varkave me vela “Regata Brindisi”, një aktivitet që përforcon lidhjet mes Italisë dhe Shqipërisë përmes Adriatikut.
Nga 51 varka të regjistruara, 45 u nisën nga brigjet e Brindisit dhe përshkuan rrugën detare drejt Orikumit për 12 orë me radhë, në një garë që solli emocione dhe rivalitet të fortë mes ekipeve.
Varka “Verve” u shpall fituese e këtij edicioni, duke u dalluar që në nisje për shpejtësinë dhe manovrimin e saj. Ndërkohë, rreth 10 milje nga pika e nisjes, anija “Amams” u detyrua të tërhiqej për shkak të një defekti teknik.
Ceremonia e ndarjes së çmimeve u mbajt të shtunën në Portin e Orikumit dhe u shoqërua me mesazhe nga presidenti i sapozgjedhur i LNI Brindisi, Gianluca Fischetto, si dhe nga paraardhësi i tij, Salvatore Zarcone, i cili ishte edhe kordinator i garës Brindisi-Vlorë. Të dy vlerësuan nivelin organizativ dhe interesin e madh që ky edicion ngjalli.
Mes të ftuarve nderi ishte edhe konsulli i përgjithshëm italian në Vlorë, Achille Provenzano, i cili theksoi rëndësinë kulturore dhe historike të këtij eventi si dhe ndikimin e tij në forcimin e bashkëpunimit mes dy vendeve.
Regata, që zhvillohet në Vlorë prej katër vitesh rresht, po shndërrohet në një simbol të turizmit sportiv dhe e forcon pozicionin e qytetit si një destinacion tërheqës në Mesdhe.
