Ditën e sotme zëdhënësja e KQZ-së Drilona Hoxhaj ka dalë në një deklaratë për mediat ku ka njoftuar se mbrëmjen e djeshme ka mbaruar edhe numërimi dhe tabulimi i të gjitha rezultateve në lidhje me zgjedhjet e 30 qershorit.
Hoxhaj tha se gjithsej kanë votuar 22.97% e qytetarëve që kanë të drejtë vote, ose gjithsej 812.249 persona.
Ndërkohë që numri votave të pavlefshme është më shumë se 45 mijë.
“Mbrëmë rreth orës 24:00 ka përfunduar procesi i numërimit dhe tabulimit të gjithë rezultateve në të gjithë territorin e Republikës së Shqipërisë. Sipas të dhënave paraprake të raportuara nga KZAZ-të në sistemin elektronik të të dhënave të KQZ-së rezulton se kanë marrë pjesë në votime 812.249 zgjedhës ose 22.97% të numrit total të zgjedhësve.
Numri i përgjithshëm i votave të vlefshme për kryetar bashkie është 765.825 vota, ndërkohë për këshill bashkiak 760.933 vota. Numri i përgjithshëm i votave të vlefshme për kryetar bashkie është 45.276, ndërsa për këshillat bashkiak është 49986. Nga këto të dhëna mungojnë numri i fletëve të votimit të dëmtuara apo të hedhura në kutinë e gabuara”, tha Drilona Hoxhaj.
Këtë herë ajo tha se përfundimi i rezultateve është përmbyllur brenda 48 orëve nga momenti i mbylljes së qendrave të votimit. Hoxhaj gjithashtu shtoi se rezultati përfundimtar zyrtar do të shpallet vetëm pas përfundimeve të afateve ankimore në rrugë administrative pranë KQZ apo animimeve të mundshme pranë Kolegjit Zgjedhor.
