Mjeku i njohur Erion Dasho ka pasur një reagim të fortë ndaj Komitetit Teknik të Ekspertëve dhe qeverisë për menaxhimin e situatës pandemike në vendin tonë. Dasho shkruan në një postim në rrjetet sociale se testimi i banorëve është nënvlerësuar, ndërkohë që në vendet europiane zbulohet pjesa më e madhe e rasteve. Sipas mjekut, Ministria e Shëndetësisë identifikon vetëm një rast të vdekjes me COVID dhe “humbet” ose fsheh 4 të tjera. Ai ka bërë thirrje që të shpërndahen në masë testet e shpejta sepse vendi po shkon drejt katastrofës.
Reagimi i plotë:
TESTONI, O TË PAAFTË!
Me institimin e një kolegu, ndoqa disa minuta një debat televiziv ku personazh kryesor ishte kryetarja e komitetit të ekspertëve, për të ridëgjuar se si homologia e Dr Faucit apo Dr Drostenit, edhe një vit pas fillimit të pandemisë, ende vë në dyshim dobinë e testimit.
Përgjigja e zëvendësministres për pyetjen se përse ministria nuk teston aq sa duhet ishte fraza tashmë klishe “Testimi nuk ka ndonjë rol të rëndësishëm! Edhe vendet që kryejnë shumë teste, kanë përhapje të shtuar të virusit”!
Zëvendësministrja është një profesore e nderuar në disiplinën e saj klinike, por me sa duket as edhe muaj të tërë në drejtim të kontrollit të pandemisë nuk i kanë mësuar parimet elementare të cilat OBSH ka një vit që i përsërit: testo-gjurmo-trajto!
VENDET EUROPIANE KANË NUMRA TË LARTË, SEPSE ATA TESTOJNË DHE JANË NË GJENDJE TË ZBULOJNË PJESËN MË TË MADHE TË RASTEVE!
VDEKSHMËRIA E TYRE DUKET E LARTË SEPSE ATA NUK MASHTROJNË ME SHIFRAT E VDEKJEVE!
Në Britani raporti midis vdekshmërisë vjetore shtesë dhe vdekjeve të raportuara nga COVID-i është 0.9, në Belgjikë 1.0 dhe në Gjermani 1.3! Në Shqipëri ky raport është 5.1! Kjo do të thotë se të tre vendet e sipërpërmendura arrijnë të testojnë dhe diagnostikojnë pothuajse çdo person që humb jetën nga COVID, kurse ministria dhe komiteti ynë identifikojnë vetëm 1 dhe “humbasin” ose fshehin qëllimisht 4 vdekje nga COVID të cilat kalojnë pa raportuar!
Kur sheh paaftësinë të ulur këmbëkryq në personin e kryetares së komitetit të ekspertëve, nuk çuditesh më se përse:
1 – Nga dhjetori dhe deri tani janë realizuar pak më tepër se 200 mijë teste (përfshi edhe sektorin privat), ndërkohë që janë diagnostikuar afërsisht 50 mijë raste me COVID me një shkallë pozitiviteti 25%! Ishin premtuar vetëm në dhjetor 400 mijë teste!
2 – Drejtorive të Shëndetit Publik nuk u jepen teste të shpejta shtesë megjithëse nevojat në rrethe po rriten me ritme marramendëse!
3 – Mjekëve të Familjes jo vetëm nuk ju shpërndanë testet e shpejta të antigjenit sipas premtimit të bujshëm të muajit dhjetor, por sot atyre u kërkojnë të përdorin sistemin elektronik të referimit për prenotimin e testeve të shpejta!
Të nderuar Boratë dhe zëvendës-Boratë!
Testimi është baza e përgjigjes profesionale ndaj COVID!
Pa testim nuk ka diagnozë të hershme, gjurmim dhe izolim! Pa testim nuk ka njohje të situatës epidemiologjike dhe vlerësim të efikasitetit të ndërhyrjeve! Pa testim masat kufizuese merren qesim sipas ëndërrave që sheh krye-Borati juaj dhe aspiratave të tij elektorale dhe jo sipas ecurisë së epidemisë dhe nevojave!
Rritni numrin e testimeve molekulare (testi i PCR) të paktën mbi 10 mijë në ditë!
Jepini çdo mjeku familjeje të paktën 200-250 teste të shpejta në muaj me qëllim të çdo pacient i dyshuar për COVID të ketë mundësi të kryejë testin falas si në çdo vend tjetër europian!
Lejoni shitjen e testeve të shpejta të antigjenit në farmaci dhe përfshini mjekët e familjes në administrimin e tyre që çdo person me apo pa shenja të testohet sa herë ka dëshirë apo nevojë!
Merrini këto masa sa më shpejt sepse e keni çuar vendin në katastrofë dhe koha nuk pret më!
O të paaftë!
