Përdorimi i inteligjencës artificiale e ka bërë më të thjehstë punën e gazetarëve dhe profesionistë të tjerë, edhe në Shqipëri që po përdoret masivisht. Por, përdorimi i saj ka avantazhet dhe disavantazhet e veta.
Në fillim të tetorit, një video me përmbajtje erotike qarkulloi masivisht në rrjet, ku shfaqejnjë vajzë e cila ngjante me moderatoren Luana Vjollca. Shumë persona e morën të mirëqenë se vajza në video është Luana.
Përmes disa postimeve në rrjetet sociale, Vjollca e denoncoi videon si baltosje dhe mohoi që të ishte ajo protagonistja.
Spekulimi mori fund vetëm pasi ekspertë të teknologjisë e analizuan videon dhe vlerësuan se ajo ishte manipuluar përmes teknologjisë deepfake të prodhuar përmes inteligjencës artificiale.
“Kjo teknologji jo vetëm që mund të krijojë video të manipuluara, por edhe të klonojë zërin e një personi me një saktësi të jashtëzakonshme,” sqaroi përmes një postimi në Facebook Blerim Gjeladini, përfaqësues i kompanisë së teknologjisë “Terra”.
Inteligjenca artificiale fitoi një popullaritet të jashtëzakonshëm vjeshtën e vitit 2022, kur kompania OpenAI lançoi ChatGPT [Chat Generative Pre-trained Transformer]. Prej asaj kohe, ChatGPT numëron mbi 180 milionë përdorues në të gjithë botën.
Edhe tek ne ChatGPT po përdoret edhe për manipulim informacioni. Megjithatë, episodi me videon e fillimit të tetorit ka krijuar shqetësime mbi efektet e teknologjisë në manipulimin e informacionit.
Duke qenë se lajmet e rreme krijohen për t’u shpërndarë në mënyrë virale në mediat sociale, kjo i bën ato tërheqëse për ripublikim në internet nga media që rendin pas titujve “karrem” dhe klikimeve kundrejt fakteve të verifikuara dhe informacionit të thelluar.
