Detaje të reja janë zbardhur nga kallëzimi që është depozituar në SPAK për kreun e IKMT-së, Ervin Hoxha. Rast i cili ka nxjerrë hapur edhe nënshtrimin e strukturave të policisë së shtetit, përballë grupeve kriminale në Shkodër.
Punonjësit e IKMT-së kanë konstatuar një ndërtim pa leje në zonën e Shkodrës, që në letra rezultonte në pronësi të një 79-vjeçari. Ata kishin dyshime se prona në fjalë në fakt rezultonte në pronësi të Bajrave, dhe për këtë kanë kërkuar ndihmën e policisë së shtetit, në fazën e verifikimit, gjë e cila nuk iu është vënë në dispozicion nga blutë e Shkodrës.
Për këtë shkak, zyrtarët e IKMT, janë detyruar që të vihen në lëvizje, dhe kanë zbuluar në rrugë jozyrtare se prona në fjalë i përkiste anëtarëve të grupit Bajri, të cilët kishin tentuar që të negocionin për mosprishjen e objektit, duke shfrytëzuar këngëtarin Luiz Ejlli, të cilit i kishin premtuar një pjesë të pronës.
“Pra siç shihet strukturat e policisë së shtetit megjithëse ju arsyetuam qartë se është thellësisht bindëse që autori e këtij ndërtimi të paligjshëm nuk është 79-vjeçari Zef Lgataj, por të tjerë që kanë ekspozuar këtë shtetas për të shmangur përgjegjësitë e tyre para ligjit si ato penale por dhe administrative, nuk kryen asnjë verifikim shtesë për zbulimin e autoreve të vërtetë, e si rrjedhojë nga ana jonë:
Përmes një shkresë vijuese (kopje të së cilës nuk e disponoj) i informuam se me qëllim sigurimin e provave për autorët e kryerjes së këtij ndërtimi të paligjshëm, IKMT ka kryer inspektime në subjektet prodhim-betoni që operojnë në atë zonë – tek të cilët logjikisht autorët do jenë furnizuar me beton për ndërtimin e paligjshëm,
nga ku kemi grumbulluar të dhëna për subjektet e furnizuara gjatë periudhës së kryerjes së ndërtimit të paligjshëm, të dhëna që çmojmë se mund të vlejnë për hetimin e rastit, pasi siç kemi arsyetuar është e pamundur që një 79-vjeçar të ketë realizuar këtë volum kaq të madh punimesh me projeksion akoma më të madh, pa llogaritur dhe dyshimet për burimet financiare (të dhëna të cilat ja përcillem bashkëlidhur shkresës)
nga ana tjetër ju kemi sugjeruar që në funksion të identifikimit mund të kryejnë verifikimet e kamerave të bizneseve aty pranë kantierit të paligjshëm të ndërtimit apo pyetja e personave që kanë dijeni për ndërtimin”, thuhet në kallëzimin e dorëzuar në SPAK.
