Raportuesja e Shqipërisë në Parlamentin Europian, Isabel Santos ka folur për zgjedhjet e 25 prillit në vendin tonë. Në një postim në Twitter Santos përgëzon shqiptarët për një process zgjedhor të organizuar mirë pavarësisht pandemisë Covid-19. Santos bën thirrje që aktorët politikë të lëvizin përpara dhe së bashku të vazhdojnë rrugën drejt Bashkimit Europian.
“Përgëzime për njerëzit e Shqipërisë për një proces zgjedhor që pavarësisht pandemisë Covid19 ishte i organizuar mirë. Tani është koha që të gjithë aktorët politikë të lëvizin përpara dhe së bashku të vazhdojnë rrugën drejt BE. Paç fat Shqipëri!,”-shkruan Santos.
Të dielën e 25 prillit u mbajtën zgjedhjet parlamentare në Shqipëri. Nga numërimi i pjesës më të madhe të kutive, Partia Socialiste rezulton fituese. Konkretisht, janë numëruar 5034 nga 5199 Qendra Votimi dhe PS ka 736966 përkthyer në 74 mandate. Partia Demokratike dhe Aleanca për Ndryshim kanë marrë 596871, thënë ndryshe 59 mandate deputetësh. Lëvzija Socialiste për Integrim ka arritur të sigurojë 103568 ose përkthyer në mandate, katër të tilla. Tre mandate ka arritur të sigurojë edhe Partia Social Demokrate me 33855 të fituara. Pas numërimit të votave për partitë politike, pritet të fillojë edhe numërimi i votave që ka siguruar secili kandidat, për të mësuar cilët do të jenë emrat që do të përfaqësojnë qytetarët shqiptarë në parlament për 4 vitet e ardhshme.
