Vendi ynë nuk ka arritur dot të plotësojë 2% e shpenzimeve për ushtrinë, siç e kërkon Aleanca e Atlantikut Verior (NATO).
Edhe pse vendet e tjera në rajon po forcojnë akoma dhe më shumë sigurinë për shkak të sulmeve agresive nga fuqitë botërore si Rusia apo Kina.
Sipas të dhënave të bëra publike nga “Balkan Defence Monitor 2024”, Shqipëria renditet edhe më dobët se Maqedonia e Veriut për vitin 2023, ndërsa vendin e parë për shpenzimet për ushtrinë e kryeson Serbia me 2% të GDP-së së saj.
Në vend të dytë renditet Maqedonia e Veriut me 1.7%, më pas vjen Shqipëria me 1.6%.
Megjithatë, Shqipëria dhe Maqedonia e Veriut parashikohet të kalojnë Serbinë, e cila pritet të zbresë në vendin e tretë në rajon me 1.8% në 2024.
Ndërkohë, të gjithë aleatët e NATO-s, përfshirë ata në Ballkanin Perëndimor, po përmbushin një kërkesë tjetër, që të paktën 20% e shpenzimeve të mbrojtjes të përdoren për pajisje.
