Ambasadori BE-së, Luigi Soreca, në një konferencë të përbashkët me kryeministrin Edi Rama u shpreh se vendi ynë i ka përmbushur kushtet e vendosura nga Këshilli Europian dhe “tani është momenti për të mbledhur Konferencën e Parë Ndërkombëtare”.
Një ditë më parë, u publikua Progres Raporti i KE-së për Shqipërinë, ku u rekomandua hapja e negociatave për Shqipërinë, pasi i ka plotësuar kushtet.
“Bashkimi Evropian duhet të lexojë Progres Raportin, vendet anëtare duhet të shohin se Shqipëria i ka përmbushur kushtet dhe është koha për të ulur në tryezë të përbashkët me Shqipërinë dhe Maqedoninë e Veriut. Shqipëria ka vijuar me përparimet për reformat. Raporti tregon se Shqipëria i ka përmbushur kushtet e caktuara nga Këshilli. Konferenca e parë duhet të mblidhet brenda vitit”.
Sipas ambasadorit, ka rezultate dita ditës, jemi besimplotë që qeveria dhe kuvendi janë të gatshëm për të bërë punën e mëtejshme. “Në fushën e sundimit të ligjit, raporti tregon se ka përmirësim në vetting, luftën kundër korrupsionit, duke krijuar trupat e reja të specializuara për zbatimin e ligjit. Fusha kyçe ku duhet të vazhdojë puna e ndërprerë është procesi i vetting-ut”.
Soreca thekson se shtyrjet për anëtarësim do të kenë ndikim negativ për besueshmërinë për Unionin.
Ndërsa kryeministri Edi Rama tha se Evropa nuk ka në plan të zgjerohet duke theksuar se Shqipëria nuk do t’i ndalojë përpjekjet për të bërë progres, gjatë konferencës me ambasadorin e BE.
Ai ka përsëritur se raporti e vulos objektivisht se Shqipëria vjen nga një proces zgjedhor i padiskutueshëm në pikëpamje të integritetit dhe të përputhjes me standardet dhe rekomandimet e OSBE-ODIHR.
Përpjekjet tona për ta përafruar kuadrin legjislativ me BE-në vihen re dhe vlerësohen. Progresi për një ekonomi funksionale tregu është evident. Këto janë disa nga pikat kyçe. Raporti i Progresit nuk është thjesht një dokument që bën vlerësime pozitive por edhe që nxjerr në pah sfidat dhe problemet që duhen adresuar. Përtej progresit që ka bërë, nuk është një vend që mund të bëhet sot anëtare edhe sikur të donin të tjerët që nuk e duan se Evropa për tani nuk ka oreks për zgjerimin. Në mbyllje dua të them që ne nuk do të ndalojmë me përpjekjet tona në bazë nëse hapen po jo negociatat. Ne e bëjmë për fëmijët tanë që të jetojnë në një vend me të njëjtën cilësi si në Bashkimin Europian”, tha Rama.
