Në një kohë kur në vendin tonë ka shkuar në 10 numri i personave të prekur, kryeministri Rama ka mbledhur sërish qeverinë, ku pritet të merren të tjera masa rreth Covid-19.
Pak para mbledhjes së kabinetit, kryedemokrati Lulzim Basha doli në një konferencë për shtyp, ku hodhi akuza rreth maskave të përdorura në vendin tonë, duke thënë se kanë skaduar dhe janë jashtë kushteve të përdorimit.
Fillimisht, kësaj akuze kreu i qeverisë iu përgjigj me një status në Twitter, ku tha se maskat e dëmshme në Shqipëri janë ato që kërkojnë pushtet e rrëmujë, edhe kur vendi kërcënohet nga viruset.
Mirëpo, akuzave të Bashës kryeministri i është përgjigjur edhe në mbledhjen me ministrat ku me një ton të ashpër dhe duke i rënë tavolinës tha se maskat kanë ardhur si dhuratë nga Kanadaja për një shoqatë bamirëse dhe i janë shpërndarë stafit mjekësor për t’u mbrojtur.
Madje, për të vërtetuar se maskat nuk janë të skaduara Rama vendosi vetë një maskë para kamerave, teksa theksoi se maskat në fjalë nuk funksionojnë në salla kirurgjikale, por se janë shumë të efektshme për situata të tjera.
Edhe një herë, kryeministri bëri thirrje për të respektuar rregullat, duke thënë se nuk është koha për të treguar trimëri.
Ndër të tjera kryeministri tha:
Këto janë maskat që janë shpërndarë për të gjithë personelin shëndetësor, në qendrat shëndetsre, në spitale që nuk janë të pëfshirë në frontin e parë në perimetrin e luftës me të infektuarit me koronavirus.
Këto janë maska që kanë ardhur në Shqipëri si dhuratë nga fondacioni i njohur “Bijtë e Shqipërisë” nga Kanadaja.
Janë ndaluar në Doganën e Durrësit pasi siç dihet në shtetin tonë ka pasur një regjim doganor për çdo material qoftë dhe ato humanitare.
Ishin dërguar nga një shoqatë humanitare që pas thirrjeve të vazhdueshme nuk u paraqit për të tërhequr këto pako që janë prodhim amerikan.
Nëse këto maska do të ishin të rrezikshme dhe nëse kadenca e tyre do të implikonte se ulja e efiçencës së tyre në sallat kirurgjikale që operohet në kushte sterilizimi nuk dilnin dot nga Kanadaja dhe SHBA e nuk mund të përshkonin oqeanin për të ardhur në Shqipëri.
Pas datës së skadencës këto maska mund të përdoren pa asnjë problem jashtë sallave kirurgjikale.
Këto janë maska që e zëvendësojnë shumë herë më mirë facoletën ose garzën për mbrojtjen në kontaktin me personat e tjerë.
As më shumë dhe aq më pak të thuash se këto janë maska të rrezikshme është vetëm që të hapësh panik.
Sot nuk është koha për të luftuar me qeverinë, si politike por si të luftojmë të gjithë ndaj një armiku që e ka nxjerrë botën nga binarët.
