Ceremonia e hapjes së Lojërave Olimpike ka nisur prej disa orësh në Tokio, pas debateve të shumta që kanë shoqëruar eventin e këtij viti.
Ekipet e sportistëve nga e gjithë bota kanë parakaluar me flamujt përfaqësues dhe mes tyre kanë qenë edhe atletët shqiptarë. Briken Calja dhe Luiza Gega ishin flamurmbajtësit për Shqipërinë, teksa parakaluan së bashku me pjesën tjetër të ekipit.
Kryeministri Edi Rama nuk ka vonuar me reagimin e tij pas nisjes së Lojërave, duke shpërndarë videon e parakalimit të ekipit shqiptar. Rama i uron suksese atletëve, të cilët i priti pak kohë më parë për t’i dorëzuar edhe flamurin.
https://fb.watch/6WyM2h1oh7/;
Kjo është paraqotja e nëntë për Shqipërinë në Lojërat Olimpike, ndërsa për herë të parë vendi ynë ka marrë pjesë në Olimpiadën e vitit 1972. Vendi ynë ende nuk ka fituar një medalje olimpike.
Lojërat Olimpike “Tokyo 2020” nisin ditën e sotme, për t’u mbyllur në 8 gusht. Olimpiada u shty me një vit për shkak të pandemisë së koronavirusit dhe deri në momentet e fundit ka pasur dyshime nëse do të vazhdonte me organizimin e saj, pasi rastet me Covid-19 në kryeqytetin japonez kanë ardhur në rritje për shkak edhe të variantit Delta. Një ditë para nisjes, organizatorët shkarkuan edhe drejtorin e ceremonisë së hapjes, për shkak të komenteve të papërshtatshme në të kaluarën për Holokaustin.
