Kryeministri Edi Rama ka qenë ditën e sotme në një vizitë në Austri, ku ka takuar drejtuesit e universitetit BOKU me të cilët është nisur një dialog për mbështetje të drejtëpërdrejtë ndaj Universitetit Bujqësor të Tiranës.
Rama tha se ëndrra e tij është që të ketë universitetin BOKu në shërbim të universitetit në Shqipëri. Kryemnisitri u shpreh se arsyeja pse ai shkoi në Vjenë është se i jep rëndësi të veçantë programit të ri të qeverisë që do të jetë një përparësi me nisjen e mandatit në shtator.
Ai gjithashtu falenderoi Austrinë për rëndësinë që i ka kushtuar Ballkanit dhe se pavarësisht se kush ka qenë në krye, nuk është lëkundur kurrë në vullnetin për të mbështetur Shqipërinë.
“Arsyeja se pse erdha unë këtu dhe po i jap një rëndësi të veçantë programit të ri të qeverisë që do të jetë një prej përparësive të mandatit tjetër që nis në shtator. Dhe kjo ka të bëjë me përpjekje për të krijuar sinergji mes universiteteve europiane dhe atyre shqiptare. Erdha vetë për t’u siguruar që përmes pranisë time do të kuptoni se sa e rëndësishme është kjo. Do të thoja që ëndrra jonë është të kemi universitetin tuaj në shërbim të universitetit të Shqipëri. Ju e dini se sa rëndësi i kushton Austria Ballkanit prej shekujsh edhe gjatë tranzicionit të ndërtimit të një shteti demokratik. Qeveria austrike pavarësisht nga ngjyra e koalicionit që udhëheq vendin nuk është lëkundur në vullnetin e saj për të mbështetur Shqipërinë”, tha Rama.
