Kryeministri Edi Rama ndodhet në Shkodër në kuadër të takimeve për fushatën elektorale për zgjedhjet e 25 prillit. Gjatë fjalës së tij ai ka sulmuar edhe kryetaren e Bashkisë së këtij qyteti, Voltana Ademin, për të cilën ka thënë se është shembulli më drithërues i injorancës.
“Unë jam këtu sot për t’iu thënë shkodranëve se nëse duan të na japin mundësinë të shlyejmë borxhet tona, të na japin mbështetje. Për të mbështetur Shkodrën ne i kemi ardhur vërdallë kufijve të vendosur nga një bashki qorre, që është shembulli më drithërues i injorancës, prapambetjes, inercisë, duke shkuar qorrazi drejt të ardhmes. I kemi ardhur rrotull dhe kemi ndërtuar rrugën Shkodër-Velipojë, një rrugë turistike që ishte një premtim dembabadem i të gjitha herëve që PD ka ardhur këtu për të marrë votën dhe që nuk u ndërtua kurrë”, deklaroi Rama.
Më tej ai ka thënë se Partia Demokratike po përdor komunizmin për ta mbajtur peng Shkodrën. Rama ka thënë se PD nuk mund të votohet, pasi kur ia jep votën një idioti mbetesh peng i tij
“E ndërtuam ne, duke i ardhur rrotull se nuk merrnim dot leje në bashki. Ata duan ta mbajnë Shkodrën në këtë gjendje. Komunizmi ka vdekur dhe mban peng vetëm Shkodrën, nga këta që e përdorin komunizmin për të marrë peng gjithë Shkodrën. Nuk mundet dot ti të shkosh të votosh, sikur shkon për të bërtitur në stadium ditën e diel, se të hënën dita vazhdon. Dhe kur ti ja jep votën një idioti, je peng i tij. Shkodra ka mbetur peng e një idiotësie prej 30 vitesh, me idenë se po i reziston komunizmit, që ka vdekur dhe që s’ka asnjë shans të ringjallet, por rri gjallë në formën e fantazmës këtu në Shkodër”, tha kryeministri.
