Kryeministri Edi Rama ka folur në lidhje me skandalin e të dhënave të votuesve që Partia Socialiste i zotëron. I ftuar në emisionin “Përballë, Rama ka thënë se është PD ajo që ka të gjitha databazat dhe po i çmend njerëzit me telefonata. Sipas Ramës, diçka e tillë ndodh kudo në botë dhe të gjitha partitë e bëjnë, por gjithsesi ekseli është shumë i vjetër për të qenë i PS.
“S’ka lidhje me AKSH! Çfarë duhet të themi me PD që me “call-centerat” e Agron Shehajt e çmendi këtë milet me telefonata. Sot në zyrë, të gjithë njerëzit e zyrës ishin marrë në telefon nga PD. Kanë të gjitha databazat dhe e çmendën miletin në telefon. Të gjitha partitë e bëjnë këtë, kudo në botë. Jo vetëm këtu. Ai ekseli është shumë i vjetër për të qenë i PS-së,”- tha Rama.
Më tej ai ka komentuar edhe faktin se vazhdimisht ka refuzuar një debat me Bashën duke thënë se diçka e tillë nuk ka ndodhur asnjëherë. Rama do pranonte debatin vetëm nëse përballë do të kishte një lider përgjegjës për ato që thotë.
“S’di të ketë pasur ndonjëherë në zgjedhjet shqiptare debat me kryeministrit dhe rivalëve përkatës. Nëse është një traditë dhe unë e kam thyer më thoni. Do duhej që të ishte vërtet përballë një lider që është përgjegjës për atë që thotë dhe atë që bën dhe jo dikush që edhe pse falë konsulentëve i ka fshehur nga ekranet ata që e kontrollojnë dhe ata që mund ta fshijnë për 30 sekonda nga ai pozicion. Është fare e thjeshtë”, ka thënë Rama.
