Në takimin e tij të radhës, kryeministri Rama nuk është kursyer edhe një herë për të sulmuar rektorin e Universitetit të Tiranës, Mynyr Koni.
Në një takim me studentët në raundin e IV të programit Kombëtar të “Praktikave të Punës”, Rama ka thënë se nëse studentëve iu mungon aksesi në “Billiotekën Online”, përgjegjësi kryesor është Koni dhe askush tjetër.
Për më tepër sipas Ramës deri më tani universiteti është përdorur për të krijuar tendera dhe ky nuk është synimi i tij si insitucion, por duhet të krijojë të gjitha kushtet për t’i shërbyer nevojave të studentëve dhe të gjithë Universitetit të Tiranës, duke përfshirë edhe stafet akademike.
“Ky është kulmi, që të sigurohet biblioteka dixhitale për studentët dhe që UT që mos ta përdori dot se nuk ka sistem teknologjik, që lejon përdorimin e bibliotekës dhe studentet të jenë të përjashtuar nga aksesi për shkak se rektori dhe rektorati, të cilët kanë përgjegjësi. Kjo është kulmi. Unë nuk e di se çfarë duhet të ndodhë më tepër.
Të gjithë punët e studentëve të mbahen me kopje në dorë sikur të jemi në kooperativën bujqësore dhe më e rënda është se në vend që t’i zgjidhi, rektori ankohet. Ankohet se pse unë e sjell këtë temë në diskutim, por si t’ia bëjmë? Ta mbajmë këtë përgjegjësi edhe ne. Universiteti është autonom, po nuk është thjesht liri për të bërë tendera apo e drejtë për të bllokuar univesitetni për tendera, por është përgjegjësi. Duhet një zgjidhje, ndërsa ne kemi propozuar që mos të ndërhyjmë, por realisht është problem.”
Mirëpo kryeministri nuk është kursyer për të hapur edhe një herë temën e titujve akademikë të marrë pa të drejtë dhe sipas Ramës vlerësimi i këtyre titujve i takon universitetit. “U bën doktorët e shkencave sikur të jenë shalqinj”, ka thënë kreu i shtetit.
“Kur thoja se unë do të mbetem protestuesi i fundit, ju atëherë qeshnit dhe më thoshit: Shko njëherë plotëso 8 pikat. Vlerësim i titujve akademikë e bën universiteti. Asnjë hap, zero, pse? Sepse ajo do të hapë një proces njësoj si ai i gjykatësve dhje prokurorëve dhe ka shumë nga ata që janë profesor që iu shfaqen si pedagogë, por në fakt janë sharlatanë dhe titujt i kanë pa asnjë lloj vlere dhe asnjë lloj baze. U bën doktorët e shkencave sikur të jenë shalqinj. Do durojmë e do durojmë, por edhe ne do të plasim në fund”-tha Rama sot në një bashkëbisedim me studentët.
