Kryeministri i vendit Edi Rama, ka bërë publik ditën e sotme një grafik i cili tregon kurbën e COVID-19 në vendin tonë. Me anë të një postimi në rrjetet sociale kryeministri është shprehur se në dy javët e fundit, Shqipëria dhe Islanda janë vendet me më pak të infektuar nga koronavirusi në Evropë. Sipas grafikut të bërë publik nga Rama, por edhe nga shifrat që ka bërë publike Ministria e Shëndetësisë, vihet re një ulje e rasteve të cilat dalin pozitive dhe më pak vdekje nga koronavirusi. Kujtojmë se në javën e parë të qershorit nuk pati asnjë viktimë nga COVID-19, ndërsa ditën e djeshme fatkeqësisht një person nuk e fitoi dot betejën me virusin e vështir. Po ashtu edhe shifrat e të infektuarve kanë rënë ndjeshëm.
“Në matjen globale të dy javëve të fundit për uljen e rasteve të infektimeve, Shqipëria dhe Islanda, figurojnë si dy vendet me më pak raste infektimesh në kontinentin tonë😍”. ka shkruar në postimin e tij në rrjetet sociale, kryeministri Edi Rama.
Kujtojmë se në bilancin e bërë nga Ministria e Shëndetësisë ditën e djeshme lidhur me pandeminë e COVID-19, ka ndërruar jetë një person dhe janë shënuar 5 raste pozitive nga 2103 testime që janë kryer në të gjithë vendin.
Gjithashtu Ministria e Shëndetësisë dhe Mbrojtjes Sociale herë pas here iu bënë thirrje të gjithë qytetarëve që të ruajnë vigjilencën dhe të zbatojnë masat anti-COVID.
