Kryeministri Edi Rama ka prezantuar kandidatët për deputetë të qarkut të Tiranës teksa gjatë fjalës së tij ka thkesuar se përzgjedhja e Luljeta Bozos dhe Najada Çomos nuk ka qenë e rastësishme. Rama ka thënë se ka ende shumë punë për të bërë sidomos në aspektin e shëndetësisë. Ai u shpreh se Shqipëria nuk do ta kishte përballuar virusin nëse nuk do të ishin bërë investimet që janë bërë deri tani, teksa më parë spitalet kanë qenë në gjendje të mjerueshme.
“Është e qartë që qoftë zgjedhja e Luljetës apo e Najadës nuk janë të rastësishme në një kohë që ne jemi të detyruar të kalojmë dy ngjarje të rëndësishme. Siç ishte sfida e rindërtimit që na sprovoi deri në fund si shoqëri. Dhe pse kemi bërë shumë në të gjitha drejtime, sidomos në atë të shëndetësisë. Ajo që mbetet për tu bërë në mënyrë që shëndetësia jonë të shkojë në një nivel tjetër, nuk është pak. Pyetja vjen natyrshëm: Çfarë do të kishim bërë, si do ta kishim përballuar si shoqëri, goditjen nga virusi, nëse nuk do të kishim bërë të gjithë atë punë që kemi bërë, se çfarë përkujdesje apo mundësie do të kishte sistemi ynë të përballej, duke u qëndruar përballë njerëzve, në sallat e reanimacioneve, nëse virusi do të kishte zbritur në këtë vend, disa vite më parë, në vendin tonë, ku spitalet ishin në një gjendje të mjerueshme. Prania e Luljetës dhe e Najadës është nga njëra anë adresimi i nevojës së adresimit të kategorive të profesionistëve, që kanë pasur një rol të jashtëzakonshëm në këto muaj, nëse nisemi që nga tërmeti”, tha Rama.
Më tej kryeministri është shprehur se përballë kanë një skuadër që janë konglomerat i materialeve të së shkuarës dhe se është e paimagjinueshme nëse Shqipëria bien në duart e tyre që e kanë lënë vendin shumë më keq.Rama tha se ajo që i duhet sor Shqipërisë është vazhdimi i punëve dhe reformave të nisura.
“Sigurisht që jemi shumë larg asaj çfarë duam të bëjmë, por ne kemi përballë një skuadër që është një konglomerat i materialeve të së shkuarës. Është e paimagjinueshme të mendosh se Shqipëria do të bjerë në duart e tyre që e kanë lënë vendin e tyre shumë më keq. Ajo që i duhet sot vendit është vazhdimi me edhe më shumë forcë e kurajo i të gjitha reformave dhe punëve të nisura. Kemi bërë shumë, ka shumë për të bërë. Beteja jonë është kaq e rëndësishme për vendin, për të ardhmen se sa për të gjithë ne që jemi këtu në nivelin personal”, deklaroi Rama.
