Kryeministri Rama nuk pret Komisionin e Venecias, por e kalon menjëherë për shqyrtim dekretin e Presidentit Meta për kthimin e Kodit Zgjedhor. Kështu, të martën, më 27 tetor 2020, Komisioni i Ligjeve ka vendosur me urgjencë në rendin e ditës temën “Shqyrtimi i Dekretit të Presidentit të Republikës nr. 11797, datë 22.10.2020 “Për kthimin e ligjit nr. 118/2020 “Për disa shtesa dhe ndryshime në ligjin nr. 10019, datë 29.12.2008, “Kodi Zgjedhor i Republikës së Shqipërisë”, i ndryshuar”.
Në mbledhjen që do të zhvillohet në orën 12.00, sipas burimeve nga Kuvendi, do të ketë një shqyrtim të shpejtë me qëllim që kjo çështje të bëhet gati të futet në seancën parlamentare të së enjtes.
Urgjenca e Ramës
Ideja për ta futur menjëherë dekretin në rendin e ditës është e kryeministrit Rama, i cili e justifikon këtë akt, me qëllimet e Presidentit për të marrë peng mazhorancën.
“Ky President i angazhuar si një ekstremist kundër Parlamentit dhe Qeverisë Shqiptare, s’merr dot peng askënd dhe asgjë përveç institucionit që fatkeqësisht ka marrë peng! Opinioni i Venezias mirësetëvijë kur të vijë, por koha për këto zgjedhje s’pret asnjë ditë jashtë procedurave.
Mendimi i Venecias është gjithnjë i mirëseardhur, por për një ligj të votuar dhe të refuzuar nga Presidenti, procedura është e qartë: Refuzimi i Presidentit pranohet ose rrëzohet nga parlamenti! PARLAMENTI DO TË RISHPREHET PA HUMBUR ASNJË DITË!” shkruante Rama sot në rrjetet sociale.
Këshilla e Komisionerit
Këshillën për të pritur vendimin e Komisionit të Venecias, kryeministri Edi Rama e ka marrë nga komisioneri i Zgjerimit, Oliver Vahelyi, por nuk e ka përfillur.
Eurokomisioneri për zgjerimin Oliver Varlehyi ka reaguar pas vendimit të presidentit Meta për ta çuar Kodin Zgjedhor në Venecia.
“Unë besoj se Komisioni i Venecias do të sigurojë këshilla të shpejta për palët e interesuara shqiptare mbi zbatimin e Ndryshimeve Kushtetuese të 30 korrikut. Parlamenti duhet të marrë në konsideratë që të presë këshillat e Venecias, dhe më pas të vendosë për rivotimin. Është koha që të shikoni drejt zgjedhjeve të lira dhe të ndershme në prill 2021”, shkruante në reagimin e tij Oliver Vahelyi.
Ndërsa Presidenti Meta u shpreh se “I kam kërkuar opinion urgjent Komisionit të Venecias, për ndryshimin e njëanshëm të Kodit Zgjedhor nga ana e mazhorancës. Unë kam demonstruar përgjegjësinë e presidentit për mbajtjen e zgjedhjeve të lira dhe të ndershme në vend.
Unë shpresoj që të ketë një reflektim, dhe presidenti në çdo rast ka shumë zgjidhje, që do të kërkojnë mbështetjen dhe bashkimin e popullit shqiptar, që do të synojnë të ardhmen europiane të vendit”, deklaroi Meta.
/GazetaReforma.com/
