Mbrëmja gala e Samitit të Diasporës sigurisht që pritej të ishte një mbrëmje e mrekullueshme, por mes duket vëmendjen kryesore e ka marrë kryeministri Rama me batutat që ka shpërndarë gjatë fjalës së tij.
Nuk ka kursyer edhe këtë herë t’i drejtohet “kazanit mediatik”, ashtu siç i quan ai mediat, ku ka thënë se shumë prej tyre e kanë sharë samitin, por këtë e konsideron gjë të mirë miku i tij budist, Pandeli Majko. Në këtë moment salla ka shpërthyer në të qeshura, ndërkohë që edhe vet kryeministri ka nisur të qeshë.
“Kazani i Diasporës kishte shkruar për samitin tonë. Njëri thoshte samit vakie, tjetri i përçarjes, por po t’i besosh mikut tim budist, Pandeli Majkos, të gjitha këto janë shenja të mira”, ka thënë Rama.
“Në këtë samit ne kemi mundur të tregojmë për ata që kanë qenë të interesuar të ndjekin panelet, se kemi punuar për të vendosur disa shtylla, qoftë në aspektin logjistik, qoftë që procesi të mos jetë proces ndërveprimi spontan. Pra kemi hedhur një hap tjetër në marrëdhëniet tona”,- vijoi kryeministri.
Kryeministri i dorëzoi sakaq edhe tenorit shqiptar me famë botërore, Saimir Pirgut çmimin “Shqiponja e Artë e Diasporës”, të cilin e këshilloi më tej, t’i jepte krahë shqiponjës.
