Kryeministri Edi Rama mori pjesë në ceremoninë e çmimit ndërkombëtar “Karli i Madh” në Aachen, Gjermani, ku mbajti fjalën kryesore. Në fjalimin e tij, Rama theksoi krenarinë e Shqipërisë për frymën e saj të tolerancës shoqërore dhe rolin e saj unik në mbrojtjen e hebrenjve gjatë Luftës së Dytë Botërore.
“Jam me fat që vij nga një vend që krenohet me frymën e vjetër të tolerancës shoqërore. Shqipëria, një vend me shumicë myslimane, ishte i vetmi vend në Europë që kishte më shumë hebrenj në fund të Luftës së Dytë Botërore sesa përpara se të fillonte lufta,” tha Rama.
Ai theksoi se toleranca kërkon një përpjekje aktive dhe të vazhdueshme për të përfshirë pikëpamje të ndryshme dhe për të ndërtuar një dialog të qëndrueshëm ndërmjet besimeve. “Vetëm një formë tolerance që nuk braktis dialogun mes besimeve mund të mbrojë të mirën më të rëndësishme përtej mosmarrëveshjeve,” shtoi ai.
Çmimi “Karli i Madh” është një nga nderimet më të rëndësishme europiane që prej vitit 1950. Këtë vit, ai iu dha Kryerabinit Pinchas Goldschmidt, President i Konferencës së Rabinëve të Evropës, për kontributin e tij në promovimin e dialogut dhe tolerancës ndërmjet komuniteteve fetare në Evropë.
