Kryeministri Edi Rama ka ngritur shqetësime serioze për ndikimin e platformës së mediave sociale TikTok tek adoleshentët shqiptarë, duke e krahasuar atë me një “shok të keq” që duhet hequr nga duart e fëmijëve. Deklaratat u bënë gjatë një vizite në shkollën “Halit Çoka” në Kamëz.
Sipas kryeministrit, TikTok përdor algoritme që stimulojnë përmbajtje negative dhe është kthyer në një problem serioz për të rinjtë. Ai vuri në dukje se varësia nga aplikacioni ka arritur në pikën ku adoleshentët reagojnë negativisht kur u hiqet celulari nga dora.
“TikTok është si një drogë dhe stimulon ngjarje tepër të rënda,” u shpreh Rama, duke shtuar se ky rrjet social duhet të merret nën kontroll, veçanërisht për përdoruesit nën 16 vjeç. Ai theksoi gjithashtu problemin e mungesës së filtrave efektivë për të verifikuar moshën e përdoruesve, duke qenë se rrjetet sociale lejojnë anonimitetin.
Kryeministri sugjeroi se bllokimi i TikTok mund të jetë një zgjidhje e përkohshme, ndërsa pritet që vende të tjera të zhvillojnë mekanizma më efektivë kontrolli. Megjithatë, ai pranoi se bllokimi nuk është zgjidhja përfundimtare dhe theksoi nevojën për bashkëpunim mes shkollës, prindërve dhe mësuesve.
Gjatë vizitës, Rama vlerësoi edhe cilësinë e infrastrukturës arsimore në Kamëz, duke theksuar se shkollat dhe kopshtet në këtë zonë plotësojnë standardet e kryeqyteteve evropiane.
