11 700 doza të vaksiëns Pfizer për Covid-19 kanë mbërritur mbrëmjen e sotme në aeroportin e Rinasit. Lajmin e ka bërë me dije vetë kryeministri Rama duke ndarë një foto në rrjetet sociale dhe duke bërë me dije se numri i vaksinave të mbërritura në vend deri tani ka kaluar mbi 967 mijë.
“Aeroporti “Nënë Tereza” – 11,700 vaksina Pfizer sapo kanë mbërritur në Shqipëri, duke kaluar mbi 967 mijë sasinë e vaksinave të mbërritura deri tani
#VaksinimiNukNdalet
#ShqipëriaBuzëqesh”, shkruan Rama.
Kujtojmë që ditën e sotme, ministrja e Shëndetësisë, Ogerta Manastirliu bëri me dije se gjithashtu në vend pritet të mbërrijnë edhe 100 mijë doza të vaksiëns kineze që tashmë është e miratuar nga OBSH. Ndër të tjera Manastirliu tha se deri tani janë bërë më shumë se 836 mijë vaksinime në të gjithë vendin.
Së shpejti presim edhe lëvrimin e dozave të radhës. Marrëveshja që po diskutojmë në këtë seancë garanton edhe 500 mijë doza vaksinash kineze, tashmë e miratuar edhe nga OBSH. Më shumë se 836 mijë vaksinime janë bërë deri tani në të gjithë vendin.”, ka thënë ministrja e Shëndetësisë, Ogerta Manastirliu.
Kujtojmë që vaksinimi në vendin tonë ka nisur që prej muajit janar, ndërsa në muajin mars filloi masivisht. Vaksinat që përdoren në vendin tonë janë Pfizer, AstraZeneca, Sinovac dhe Sputnik V.
