Kryeministri Edi Rama ka vazhduar me akuzat ndaj Partisë Demokratike nga Shkodra, ndërsa nuk ka kursyer as ironinë. Rama ka thënë se ata që duan të votojnë për PD-në dhe për Bashën “do hanë një taksë për dashurinë”. Kryeministri u shpreh se PD do ta kthejë çdo gjë pas dhe kush i voton është e sigurt se merr tramvajin e Tiranës e nuk kthehet kush të japë llogari.
“Këta ça duan tani të votojnë për PD, duan edhe ta votojnë Lulin e të hanë një taksë për dashurinë, s’është çështja të bëhesh me PS dhe të duash Edi Ramën, por të jesh me veten tënde dhe qytetin që jeton, pasi Shqipëria është fjalë e madhe. Nëse je me këto nuk duhet të ndryshosh rrugë. Prindërit që duan të çojnë në universitet fëmijët, ca duan, që të ndeshen prapë me atë kohë, kur fëmija yt, edhe pse me mesatare të mirë, nuk futej në degën që doje. Sot është sipas meritës, vjen fëmija i çobanit në mal, del i pari dhe nuk e ndalon dot, sepse çdo gjë lë gjurmë. Ata duan ta kthejnë këtë gjë, sot ishim tek Vau i Deës dhe aty një pjesë kishte ujë dhe disa të tjerë do të kenë. Doni të kthehet prapë historia me lodrat, tubat dhe partinë, apo të kthehet prapë historia e fashave për energjinë elektrike, ata e kanë pjesë të fushatës. Këta duan t’i kthejnë prapë. Kush voton këta, është e sigurt, merr tramvajin e Tiranës, s’të erdhi, s’të jep kush llogari, ka një defekt teknik do të vijë nesër”, tha Rama.
