Rama duket se në Itali ka shkuar me një qëllim të qartë dhe të saktë, të sqarojë situatën në të cilën ndodhet Shqipëria sot dhe njëkohësisht të përmirësojë imazhin në sytë e italianëve. Ditën e sotme, kryeministri ka dhënë një intervistë për një tjetër televizion të njohur italian, TG5.
Ai ka thënë se kohët kanë ndryshuar radikalisht dhe ne sot jemi në një periudhë rritjeje të rëndësishme. Sipas Ramës sot ne kemi nivelin më të ulët të papunësisë në 27 vite dhe jemi duke njohur rritje kryesisht në sektorin e turizmit, ku 1.5 milionë turistë italianë, akne vizituar vendin vitin që shkoi.
“Ndaj jam sot në Itali për t’ju thënë italianëve se ato imazhet negative janë pjesë e një proteste që zhvillohen brenda një km. Jashtë këtyre protestave jeta vazhdon”,- shprehet Rama.
Pjesë nga intervista
Pse e quani protestën jo popullore por të politikës?
Është një revoltë e establishmentit të vjetër që rreth 5 vite e gjysme më parë u përzu me 1 milion vota, diçka e pazakontë në Shqipëri. Ajo qeveri la pas një vend me probleme të mëdha që ne po i japim zgjidhje. Ne kemi ende probleme por jemi në rrugën e duhur.
Do mund të gjeni kompromis me opozitën?
Ne kemi detyrime ndaj njerëzve që na kanë dhënë mandatin, s’mund t’ju themi që lojën e lëmë në gjysmë dhe ta fillojmë nga fillimi duke iu lënë kundërshtarëve formacionin që duan me qëllim që të fitojnë ndeshjen.
