Edhe pse mbajti prej 3 vitesh postin e ministres së Integrimit, Klajda Gjosha nuk ka qënë e pajisur me certifikatën e sigurisë së lartë.
Fakti u bë i ditur nga vetë kryeministri Edi Rama, gjatë intervistës së tij në ‘Zonë e Lirë’. Duket se Rama, po ia kthen me një njëjtën monedhë, ish-aleatit të tij në qeverisje Ilir Meta.
Gjosha, ishte ministre e Integrimit gjatë koalicionit qeveritar PS-LSI, kur kjo e fundit drejtohej nga Meta. Madje Rama tha se edhe Edmond Panariti kur ishte ministër i Jashtëm, s’kishte certifikatë sigurie.
Deklaratat e Ramës, vijnë në një kohë, kur presidenti Meta nuk ka firmosur dekretin e Ramës, për të caktuar si ministër të Jashtëm Gent Cakajn. Meta nuk pranoi të dekretonte Cakajn duke thënë se nuk është i pajisur me certifikatë sigurie.
“Pse Meta po sfidon kushtetutën? Për 3 vite Klajda Gjosha ka qenë pa certifikatë sigurie. Edhe Edmond Panariti ka qenë pa certifikatën e sigurisë kur ishte ministër i Jashtëm”, theksoi Rama.
