SPAK do ti kërkojë Kuvendit që ti heqë mandatit deputetit Alqi Bllako, pasi ndaj tij është vendosur masa e arrestit me burg, për përfshirjen në aferën e inceneratorëve.
Kuvendi pritet që të mblidhet duke i hapur në këtë mënyrë rrugë arrestimit të Bllakos, ku dhe më pas do të përballet edhe me akuzat.
Por gjatë kohës që kishte zhvillime nga SPAK të cilët lëshuan 15 urdhëra arresti, kryeministri Edi Rama i “pa shqetësuar” ka zhvilluar një takim me qytetarët në Kavajë ku edhe ka dorëzuar çelësat për 206 banesat të ndërtuara në kuadër të programit të Rindërtimit. Rama nuk la pa thumbuar opozitën, ndërsa iu drejtua qytetarëve duke u shprehur se bravat tashmë janë të sigurta dhe të bëjnë kujdes në zgjedhjet e tyre, sidomos për “dy gishtat”, duke dhënë kështu edhe një mesazh politik.
“Për shumë nga ju që me të drejtë ka qenë dyshues se mund të vinte dita për të bërë realitet këtë vepër. Të gjithë ju që keni ardhur këtu bravat i keni të sigurta, bëni kujdes mos vijnë t’jua bllokojnë sërish se jeni nga Kavaja dhe ndodh të ngatërroheni me dy gishtat. Por përtej shkave ky është një program që nuk bën dallim majtas apo djathtas. Sot këtu krijohet një zonë e dytë e një lagje të re”, tha Rama.
Deri në këto momente nuk ka asnjë reagim nga qeveria shqiptare, ndërsa është e paqartë nëse Edi Rama është vendosur në dijeni për urdhër arrestin e lëshuar nga SPAK në drejtim të deputetit socialist Alqi Bllakos, kjo për shkak se aktiviteti i kryeministrit zhvillohej paralelisht me zhvillimet e fundit.
