Presidenti Ilir Meta ka ftur në përballje televizive, mbrëmjen e sotme, kryeministrin Edi Rama. Në një mesazh në “Facebook”, në ditën e fundit të fushatës elektorale, Meta i drejtohet Ramës, duke i thënë se “Të ftoj edhe ty të bëhesh trim dhe të vish sot në një përballje televizive para shqiptarëve. Nëse ke siklet të vish vetëm merr kë të duash me vete”.
“Një ftesë e sinqertë për Kapedanin e Bllokut! Të ftoj edhe ty të bëhesh trim dhe të vish sot në një përballje televizive para shqiptarëve. Nëse ke siklet të vish vetëm merr kë të duash me vete, deputet nga partia ose hajde bashkë me të gjithë “të fortët” e tu.
Vij kudo që të jesh ti. Vetëm të lutem më thuaj! Bëhu njëherë trim, hë të keqen, se dita e Llogaridhënies erdhi. Të lutem më thuaj! Po pres me padurim përgjigjen tënde o trimi i xha Jahos,” shkruan Meta.
Ndërkohë më herët gjatë një takimi eletoral në Durrës, kryeministri Edi Rama ka reaguar për skandalin ku kandidati i LSI, Etien Joka shfaqet i filmuar duke premtuar dhe paguar para për blerjen e votave. Rama i bëri thirrje presidentit Ilir Meta që të shkonte dhe “t’i priste duart” kandidatit të LSI. Kujtojmë se presidenti ka deklaruar se në rast se kap një person duke vjedhur vota do i presë dorën.
“Po sot, një deputet i Ilirit dhe Monikës u kap me presh në duar, duke blerë vota për llogari të Monikës, unë thashë tashi dil Like rrëmbe sëpatën shko priti duart. Mirëpo Likja nuk doli, por lëshoi një postim: votoni, do jetë ditë feste,mos kini merak, vetëm votoni për demokraci. O Like, Like! Të kisha thënë o lëre rakinë o do të ta nxjerrin me zor dhe është me keq se sa kur e lë vetë, se kur e lë vet e lë një çik nga çik kur ta nxjerrin me zor e merr sëpatën dhe nuk di ku tja gjesh vendin. Tani mos dil më, rri mirë aty ku je. Ditën e diel do jetë ditë feste, ditën e diel të gjithë këta luanët e dalë nga zgafellet e historisë do të kthehen në lepuj të gjithë, ditën e diel patronazhistët tanë, armata jonë e zemrave dhe mendjeve”, tha Kryeministri.
