Etiketimi si kazan nga kryeministri Rama për mediat nuk ka lënë pa prekur as Zërin e Amerikës, që u përball me sulmin e kreut të qeverisë pas publikimit të lajmit të abuzimeve me punësimin e militantëve në administratën e burgjeve.
I pyetur nga Ora News, Drejtori për Europën dhe Azinë i Zërit të Amerikës, Elez Biberaj, garantoi se ky investigim është i saktë ashtu si të gjitha lajmet e publikuara nga kjo media.
Pas konsideratës negative të shprehur dhe të përsëritur për mediat shqiptare duke i etiketuar dhe me termin kazan, Kryeministri këtë herë iu përvesh edhe Zërit të Amerikës.
Sulmi i Kryeministrit ndaj kësaj media erdhi pas publikimit të përgjimeve, ku deputetë socialistë por edhe vetë kryeministri flisnin nëpërmjet telefonit me ish-Drejtorin e burgjeve, Arben Çuko, duke ndërhyrë për disa vende pune në administratën e burgjeve.
Pas publikimit të këtij lajmi, Kryeministri reagoi në tëitter, duke e quajtur këtë media kazan.
Rama në twitter: Erdhi dita që Zëri i Amerikes të flasë nga kazani i Tiranës, duke përgojuar dynjanë mbi bazë llogjesh telefonikePër herë të parë në Albania organizohet konkurs publik për punësimet në burgje dhe kazani gjëmon deri në Amerikë e jehon në katundin tonë mediatik. Çfarë katandie
Ora News kontaktoi me Elez Biberajn, Drejtori për Evropën dhe Euroazinë i Zërit të Amerikës në lidhje me hetimin e kryer dhe deklaratën e Kryeministrit. Biberaj garantoi se ky publikim është i saktë.
Biberaj: Shërbimi shqiptar i Zërit të Amerikës ka siguruar vazhdimisht raportime të sakta dhe të paanshme rreth zhvillimeve në Shqipëri dhe unë garantoj plotësisht integritetin dhe gjykimin e lajmit. Shërbimi shqiptar vijon me krenari misionin e prodhimit të gazetarisë së vlerave në mbështetje të demokracisë dhe lirisë dhe t’i sigurojë audiencës së tij lajme dhe informacione të sakta, objektive dhe të balancuara në mënyrë që ata të bëjnë zgjedhjet e duhura.
Denoncimi i Zërit të Amerikës zbuloi se si zyrtarë të lartë të Partisë Socialiste përdornin vendet e lira të punës në administratën e burgjeve për të punësuar militantët e tyre.
