Prej pak kohësh në qytetin e Shkodrës ka nisur një protestë masive ku të rinj dhe të reja, por edhe shumë qytetarë të tjerë kanë dalë për të protestuar në qendër të qytetit.
Me pankarta në duar ata po protestojnë për vdekjen e të riut Klodian Rasha, që u vra nga efektivi i policisë në Tiranë, më 8 dhjetor 2020.
Grumbullimi i qytetarëve nisi fillimisht në sheshin e qytetit, ku të revoltuar nga marrja e padrejtë e një jete të re nga forcat policore, ata kanë nisur marshimin drejt komisariatit të policisë.
“Është vrarë një djalë 25-vjeç, që mund të ishte edhe djali im! Është vrasje e pabesë!- tha një zotëri. – Këta policë i kanë zgjedhur si me shkollë, por duhet edukatë, edukatë familjare. Nuk mjafton shkolla”.
“Duhet të dorëzojnë pushtetin ose të heqin Ardi Veliun dhe Gramoz Ruçin, gjyshin e komunistëve. Se ne bëjmë 3-4 orë protestë dhe vazhdojnë prapë ata. Se kur vrasin atë, ata vrasin dhe të tjerë”.
“Që në 2013 ata vetëm arrestojnë. Një nga ata jam dhe unë, që kam bërë 30 vjet burg! Na kanë mbajtur nga 5-6 muaj vetëm me gjyqe. Jo, këta të japin dorëheqjen. Kam lënë punën sot, një tavolinë të vogël që punoj dhe kam dalë. Se më mirë të lë punën, se nuk vjen njeri të mbushë një çakmak aty ku punoj unë, por më mirë të dal këtu!”,- janë shprehur në opinionet e tyre qytetarë të ndryshëm shkodran.
Protesta të ngjashme janë zhvilluar dhe po vazhdojnë në bashkitë kryesore të Shqipërisë prej katër netësh.
/GazetaReforma.com/
