Pas deklaratës së Rimës, ku tha se për dy ditë festa do i dhurojë Kosovës energji elektrike, borxh, ka ardhur reagimi i Albin Kurtit. Përmes një konference me gazetarët nga Prishtina, kryeministri i Kosovës Albin Kurti, foli dhe në lidhje me ndihmën e dhënë nga Shqipëria për furnizimin me energji elektrike gjatë datës 31 dhjetor dhe 1 janar. Kurti tha se edhe vetë Shqipëria ndodhet në kushte të vështira energjetike, teksa deklaroi se në kushtet e vështirësisë së saj ka shprehur gatishmëri që është për t’u falënderuar dhe vlerësuar.
Albin Kurti:
Ne e falënderojmë kryeministrin e Shqipërisë Edi Rama për mbështetjen. Ministrja jonë e Ekonomisë e ka bërë një kërkesë të tillë ndaj Shqipërisë. Kemi termocentrale, ata kanë hidrocentrale. Bëhet fjalë për 2 ditë që janë të rëndësishme sepse janë të ndërrimit të viteve dhe pastaj edhe ne do kemi mundësi t’i ndihmojmë në raste nevojë verën e vitit të ardhshëm. Kjo ndihmë është e veçantë sepse edhe Shqipëria vetë nuk i ka punët mirë. Në kushtet e vështirësisë së saj ka shprehur gatishmëri që është për t’u falënderuar dhe vlerësuar
Deklarata e Ramës, lidhur me vendimin për të mbështetur Qeverinë e Kosovës sa i takon përballimit të krizës energjetike, është shoqëruar edhe me reagimin e Belinda Ballukut.
Balluku:
Kemi arritur që të sigurojmë 7680KW për datën 31 e 1 të këtij fundviti. Kjo depozitë që do të dorëzohet brenda këtij muaji, do i kërkojmë të na kthehet gjatë stinës së verës, nga qershori deri në muajin shtator.
