Kryeministri Edi Rama nuk pyet për vendimet e KQZ-së. Në ditën e parë të këtij viti ka konsumuar një kundërvajtje me rregullin që ka vendosur KQZ për ndalimin e promovimit të dhënies së shpërblimeve, lejeve, çeqeve, prerjes së shiritave etj.
Ai ishte për vizitë në maternitetin “Koço Gliozheni”, ku së bashku me ministren e Shëndetësisë, Ogerta Manastirliu kanë takuar nënat e reja dhe kanë shpërndarë disa çeqe për bebet e lindura të parat në këtë fillimvit.
Rama nuk ka lënë pa bërë edhe një batutë për baballarët e bebave, të cilët nuk ishin të pranishëm, duke shtuar se ky vit do të jetë i mbarë pasi ka ardhur me një seri vajzash.
“Baballarët ku i kanë, flenë gjumë, hej Zot i madh! Bëj shaka. Edhe njëherë gëzuar, unë besoj që ky është një vit shumë i mbarë sepse ka ardhur më një seri vajzash. Gëzuar!”, tha ai.
“Janë 24 mijë fëmijë që kanë përfituar çekun e bebes për këtë vit, rreth 26 mijë kanë lindur në vend dhe pjesa tjetër jashtë”, tha Ogerta Manastirliu. Kryeministri Rama duhej minimalisht të merrte leje për këtë aktivitet tek KQZ.
Vendimi i KQZ-së
KQZ ka marrë një vendim të guximshëm në Komisionin Rregullator të KQZ, ku PS ka mazhorancën, ka marrë vendim të ndalojë qeverinë dhe pushtetin vendor të bëjë shou në media me Rindërtimin, certifikatat e pronësisë apo me promovimin e investimeve të tjera. Vendimi ka hyrë në fuqi prej sot, ku saktësohet se do të jetë i vlefshëm dhe për rrjetet sociale. Për shkelësit parashikohen edhe gjoba të cilat shkojnë nga 10 000 – 500 000 lekë.
Nga 25 dhjetori deri në ditën e zgjedhjeve në TV dhe rrjetet sociale, kryeministrit Rama i ndalohet të dalë duke u dhuruar qytetarëve çelësat e banesave të rindërtuara.
Qeveria e Edi Ramës, kryebashkiakët apo drejtuesit e institucioneve në varësi të kryeministrisë nuk do të mund të dalin as në media apo në rrjete sociale për të promovuar aktivitetet që kanë të bëjnë me rindërtimin apo dhënien e certifikatave të pronësisë.
Ky kufizim ishte dakordësuar në Këshillin Politik me PD dhe PS, me qëllimin që mazhoranca të mos përdorte burimet shtetërore dhe publike për qëllime fushate gjatë 2021.
Po ashtu Komisioni Rregullator vendosi që 4 muaj para zgjedhjeve të mos jepen PPP-të që nuk janë parashikuar në buxhetin e vitit 2021.
Gjithashtu për çdo aktivitet publik gjatë kësaj periudhe kryeministri Edi Rama duhet të njoftojë dhe të marrë leje nga KQZ, në rast të kundër do të gjobitet. Masë administrative do të ketë edhe mediat nësë do të transmetojnë aktivitet që nuk lejohen sipas Kodit Zgjedhor.
Kryeministrit dhe ministrave i ndalohet të marrin pjesë në prezantime projektesh dhe investimesh, dhurime banesash ose shpërndarje legalizimesh 4 muaj para zgjedhjeve.
Ky ishte propozimi i Komisionerit Shtetëror të Zgjedhjeve, Ilirjan Celibashi, ku këto aktivitete cilësohen si abuzim i partisë në pushtet me burimet shtetërore në funksion të zgjedhjeve.
Lista e zyrtarëve që iu referohet KQZ përfshin: kryeministrin, zëvendëskryeministrin, ministrat dhe zëvendësministrat, kryetarët dhe nënkryetarët e bashkive, drejtorët e përgjithshëm të agjencive, apo shoqërive si OSHEE, Ujësjellës, Posta, etj.
Qeverisë i ndalohet të marrë vendime për rritjen e pagave, pensioneve, mbështetjes ekonomike apo sociale, uljen ose heqjen e taksave, vendosjen e amnistive fiskale, privatizimin apo dhënien e pasurive a të shpërblimeve.
Gjatë kësaj periudhe 4 mujore, qeveria dhe institucionet e tjera do të duhet të njoftojnë KQZ-në 5 ditë para për çdo aktivitet. Nëse Komisioneri Shtetëror do t’i vlerësojë si të ndaluara, ato duhet të anulohen dhe nuk lejohet transmetimi i tyre në media.
https://streamable.com/m8qjzj
