Mbrëmjen e djeshme, kryeministri Edi Rama deklaroi gjatë një emisioni, së do të hedhë në gjyq ish-homologun e tij kosovar Ramush Haradinaj.
Ky i fundit akuzoi Ramën, si pjesë të një pazari për ndarjen e Kosovës, me presidentin serb, Aleksandër Vuçiç dhe Hashim Thaçin.
Rama tha se Haradinaj gënjeu publikisht pas samitit të Berlinit, ndërsa mohoi faktin se i ka bërë presion për heqjen e taksës.
“Në gjykatat e Kosovës, zotëria duhet të provojë akuzën për 10 miliardë që do të ndanim unë, Hashim Thaçi dhe Vuçiçi. Që t’i thuash një populli se ishin 10 miliardë në tavolinë atyre bravo ju qoftë që marrin akoma vota. Ky dha dorëheqjen me demek dhe është akoma kryeministër i Kosovës, një person që më detyroi të dal publikisht që gënjeu publikisht pas samitit të Berlinit. Në asnjë sekondë nuk i kam bërë presion që të heqë taksën. I kam thënë vetëm që “kjo që të propozon Makron të vjen vetëm një herë. Makron në sy tim, kancelares dhe dhe presidentit të Serbisë i tha: Më jep 4 muaj Ramush dhe do futem unë në procesin e dialogut. Ti pezulloje taksën. Nuk i tha njeri hiqe. Serbia të pezullojë fushatën idiotekse kundër njohjeve dhe unë do të heq veton për vizat. Në vend që të bënte një lëvizje taktike për të marrë diçka bëri një kokëfortësi dhe sot Kosova nuk ka akoma vizat. Dhe pastaj gënjeu dhe tha që po më bëjnë presion. Këtë kryeministrin në ikje do ta çoj në gjyq”, tha Rama.
Ish-kryeministri kosovar, Ramush Haradinaj, ka reaguar ditën e sotme në lidhje me deklaratën e Ramës.
Në një lidhje telefonike me ‘News24’, Haradinaj tha se Rama ka të drejtat e veta, ndërsa shtoi edhe njëherë se është kundër ndarjes së territorit të Kosovës dhe do ta mbrojë deri në fund qëndrimin e tij.
“Sot kam parë disa tituj të portaleve në Kosovë. Por se kam përcjell direkt intervistën e tij. E kam shprehur qëndrimin tim në lidhje me refuzimin dhe kundërshtimin e ndarjes së territoreve, që ka qenë një maskim për ndarjen e Kosovës. Ajo do kishte pasoja të mëdha për planin politik të Kosovës dhe humbje të madhe për të. Rezervat më të mëdha në Europë gjendjen në Trepçë. Këto kanë qenë vendim legjitim i imi. S’kam koment për deklarata të tjera. Ai ka të drejtat e veta, ia respektoj. Unë i kam mbajtur ato qëndrime legjitime dhe vazhdoj t’i mbaj. Për Atdheun para se gjithash. S’dua të kaloj në qasje të tjera. I kam vëllezër kudo që janë shqiptarët, edhe të majtët dhe të djathtët. Detyra ime në mbrojtje të Kosovës, kjo është tokë e shqiptarëve, e të gjithë neve. Qëndrimi im kundër ndarjes është legjitim. I respektoj të gjitha të drejtat e kryeministrit, apo dhe të qytetarëve shqiptarë.”, u shpreh Haradinaj.
