Procesi i integrimit të Shqipërisë në Bashkimin Europian ka hyrë në një ngërç të ri, pasi negociatat kanë ngecur dhe nuk ka avancim konkret në hapjen e kapitujve të rinj.
Këshilli i Bashkimit Europian ka konfirmuar se nuk është miratuar Raporti i Vlerësimit të Përkohshëm të Standardeve (IBAR), një dokument kyç që përcakton nëse një vend kandidat ka përmbushur kriteret themelore të shtetit të së drejtës.
Ky raport lidhet drejtpërdrejt me kapitujt më të rëndësishëm të negociatave, konkretisht kapitullin 23 për drejtësinë dhe të drejtat themelore, si dhe kapitullin 24 për drejtësinë, lirinë dhe sigurinë. Pa miratimin e IBAR, asnjë kapitull negociatash nuk mund të mbyllet.
Sipas metodologjisë së re të zgjerimit të BE-së, ky raport është një kusht i domosdoshëm për të vijuar përpara me procesin e integrimit.
Çështja është diskutuar në dy mbledhje të Grupit të Punës për Zgjerimin dhe vendet negociuese (COELA), të mbajtura më 6 dhe 13 mars, ku ambasadorët e vendeve anëtare duhet të arrijnë fillimisht një dakordësi në parim përpara miratimit përfundimtar.
Megjithatë, për Shqipërinë nuk është arritur ende një konsensus dhe vendimmarrja është shtyrë për një afat të pacaktuar.
“Ka gjasa që edhe shumë mbledhje të tjera të COELA-s ta trajtojnë këtë çështje në javët dhe muajt në vijim”, bëjnë të ditur burime nga Brukseli.
Burime diplomatike theksojnë se Gjermania është ndër vendet kryesore që nuk kanë dhënë dakordësinë për miratimin e raportit IBAR, qëndrim që është mbështetur edhe nga disa shtete të tjera anëtare.
IBAR konsiderohet një pikë kyçe në procesin e negociatave, pasi miratimi i tij do të mundësonte përshpejtimin e integrimit dhe hapjen e rrugës për mbylljen e kapitujve.
Në mungesë të këtij miratimi, procesi i negociatave rrezikon të zvarritet për një periudhë të gjatë, duke mbajtur të bllokuar rrugën e Shqipërisë drejt Bashkimit Europian.
